गावनि गांखंजों देंखो सारफावनानै अखोरांआव
बिरलाङो जेबोला आंनि मोखांआव सायखं खोख्लैलांनानै
मोजां मोनो आं
आसिन बोथोर मोनाबिलि समनि दाउब' फालो
...
अखाफोरनिफ्राइ बिरबोनाय मोजां मोननाया
आंनि हांजों गलियै गलियै
आंखौ सोगाबनानै रंजाहोयो जेबोला
आं मोजां मोनो बिखौनो बार-अखानि गेजेराव अन्थाइ जानानै
...
बिफांआव गाखोनानै साना नायहरनाय सिगांनिफ्राइनो जुरिजेनो
उवाल-गाइहेननि सोमावसारनाय
थौसिनि गाबनाय आरो ना बाथोननि मोदोमनाय
खुन्दुं थुननाइ सोरखिनिफ्राइ गेवलांसारो गामिनि सिमां
...
दै लोमजानानै हाल्दिंगा बिजौआव
मानखोनानै थानांनाय खुसेंग्राबादि;
बे समाव राहागोथे आंनि गोसो-गोसो गोरबो
बिथा नागारनांनाय दुखुथिया बिदेशीबादि हालोद
...
आं दा खोब हाथर्खि थुख्लायनो गोरों जाबाय
बेफोरनि मादावनो माब्लाबा मोननाय माब्लाबा खोमानांनाय
आंनि जिउआव जेननायनिबो हिसाब गैलिया
सिमांखौ अब्लाबो आं बुथाराखै
...
गले गले आंनि बिखायाव गोग्लैफैनाय
हाथर्खि आरो अखाफोरनि दामोला
आंखौ मोजां मोनबाय
आरो आंबो मोजां मोनबाय बिसोरखौनो।
...
आं सोरखौबा मोजां मोनदों
आंगोनि आंगोसिन होननानै
जायखौ लानानै सानफ्रोमबो आंनि मेगन मोदै आरो रंजानाय
बियो सोरबा रावबोआनो नंआ आंनिनो सायखंसो
...
मोसौ हालिसे आरो गुरसे बिथा थायोब्लानो
उदै बुगार बुगार बिखुं बिलिर फैनाय
मोखांजों दावलांनाय सानखौ हलायहरनो हायोमोन
दोंसे मेथाइ रोजाबनानै गासै हर आरो सान
...
ननि मानसि नआवनो था
बेरेमाफोरबादि गोबा लायनानै
मोस्रोमफोरबादि हाबा-हुखा मावनानै
...