गावनि गांखंजों देंखो सारफावनानै अखोरांआव
बिरलाङो जेबोला आंनि मोखांआव सायखं खोख्लैलांनानै
मोजां मोनो आं
आसिन बोथोर मोनाबिलि समनि दाउब' फालो
आं आंनि लोगोफोरजों जेबोला
सावगारि सेबखांनो सेलायो लांदां खथा
आबुं जायो गुरसे बिखा सावगारि सेबखांग्राखौ मोजां मोननायाव
सानो आंखौ नोजोर हो आरो सावगारिखौ माबार सेबखां
जेन आंनि मोखांआव एसेबो मैला नुजाया हुस्लिमना लायो आं
आं मोजां मोनो सावगारिखौ
आं आरो आंनि गोसोथोनायनि सावगारि
आं आरो आंनि लोगोनि
आं आरो आंनि सोरगिदिं नहुरनाय सावगारि
हादिदग्लानि खौगायाव बारगनाय
दैसाखौ साबायखर होनाय ना एलेंगाबादि
आं लाथ्रहायै खुसिजोंनो रंजाखाङो
बाह! आंदि गोदानै जिउ मोनफिनबाय.......!
आं आरो फिन थैनाय नंलिया
बिखा उरसिना आंनि बिखा सिङाव
मैखोम बाहागो लाफैबाय सोदोब
सोदोबफोरा जेन आंनि जिनाय फेन-गस्लाखौबो सिलानि होबाय
बेयो दा फिरफिला बिरहोयो सोमखोर नखोरां गाब गानानै
मोजां मोननाया दा आमाइ-जुमाय गेलेयो
सुखु आरो दुखुजों
सान आरो हरजों
बेफोर सावगारिखौनो नोगोद मोजां मोनो आं
This poem has not been translated into any other language yet.
I would like to translate this poem