11 मे 2015
बिबार
बेसे समायना-रंगिना
इनायनो मुहिनि गोनां नोङो
बारग्लाङो मोदोमफ्रु समायना मोदोमनाय होनानै
आरो मिजिं सारफावना होयो मिथिंगानि बयनोबो
रुजु जाया नोंनि गुन थुलुंगा रावजोंबो
21 मे 2015
मेथाइ
मिलौनाय गोदै आरो मिलौहाबनाय दं नोंनाव
एसेबांदि गोजोन होयो नोङो गोसो गोरबो
थारै नों अमर थैरोङै
आरो नों सुफुंना होयो जिउ-जिउमा आंखाल
इनायनो गोथार इनायनो आंगो नोङो बयनिबो।
21 मे 2015
मिथिंगा
माया दं नोंनि महर-मुस्रियाव
इनायनो गोजोन आरो उसाव दं
थेवबो गुस्लायसुलि नों
इनायनो गुस्लायसुलि आरो अनसुलि नों
अं अं नों सोलायो बोथोरजों लोगोसे
गेलेयो नोंनि बिखायावनो गासै दंनायमानि
आंगो बयनिबो नों आरो बिमा जिउ-जिबिनि।
14 एफ्रिल 2016
बैसागु
बर' हारिनि गेदेमा रंजालि फोरबो
ओनसोल आरो गामि जेरावबो बरायो नोंखौ
इनायनो गोसो-गोरबो रंजाहोयो बोसोरनि आगु बैसागु;
सोरगिदिं रंजानायनि आराव जायो गामि गामि
आरो गोमखां होयो खाम जथा बायदि मेथाइजों
गैया हौवा-हिनजाव फाराग बैसागु बरायनाय रंजानायाव
उनदै-गिदिर आरो बोराय-बुरै बयनिबो आंगो बैसागु।
1 मे 2016
बर'नि बिफा
बर'नि बिफा नों, बड'फा उफेन्द्रनाथ ब्रह्म
रोजा रोजा, मेगन गेवनाय मेगन गेवै बर' फिसाफोरनि,
अाजोला माहारिनि सोमावसारनाय दैदेनगिरि नों,
नों होलांबाय जोबरोंयै बिग्रायखांनाय, उदांस्रिनि
इनाय आरो नाख्रेबनायनि हेंथायै जुजिनो।
बर'नि सोबखजानाय, नारसेबजानाय मुलुगखौ उदां खालामनो
इनाय उदखारिफोरखौ फेजेननो
फोरोंलांबाय नों बर'नि बिफा जानानै बर'फोरनो,
आरो जों नोंखौ बावनो हालिया आफा!
25 जुलाइ 2016
अखोरां
अखोरां नों आज्लंबाबो मोनहाया आखाय
खुसि होग्रा सोरां होग्रा नोङो
ओजों-हजों जेबोला सुबुंआ लामा दावबायो
रैखा नोंनो होयो आनदायबोला;
आरो नों होयो आबाद दुब्लियाव आबादनि थाखाय बार अखा
अहंकार गैया नोंनियाव, मुगैनाय गैया रावखौबो।
27 जुलाइ 2016
बार
बबेनिफ्राइदि फैयो नों, आरो बबेहाय थांफिनो
आसोल बाथ्रायाव नोंखौ रावबो उदिस लारोंआ,
रजे होनगोन, आंगो होनगोन नोंखौ नांगौबाल'।
28 जुलाइ 2016
गुरुदेब
गेदेमा हारि जानानैबो
उनदै हारि होननानै मुगै जादोंमोन बर'फोरा!
रोङै अलसिया जालांदोंमोन गावनि हाबा-हुखा!
उदायै होनजादोंमोन जेरावबो मावथि जानानैबो!
दैदेननो हारि फोसाबनो समाज रावबो गैयै जादोंमोन
एसे समावनो नों उजि फैदोंमोन कालिचरण गुरुदेब
बर' हारिखौ फोजाखांनो हारिनि गासैखौबो जौगा होनो।
10 आगस्ट 2016
खन्थाइ
खबाम दं नोंनियाव, बायदि देंखो दं
नेरनाय आरो बोराबनायबो दं नोंनियाव
थांखि दं नोंनियाव फोसाबनाय, फोजोबनाय
आरो फेहेरनायनि
इसारा होयो नों, आरो जोनोम होयो गोबां खबाम
14 आगस्ट 2016
लामा
लामा गैयामोनब्ला
आं बबेजों थाबायगौमोनथाय….!
मोखां गैजायामोनब्ला
आरो मुं गैजायामोनब्ला आंखौ माबोरै सिनायगौमोनथाय…..!
15 आगस्ट 2016
खौसेथि
खायमा अख्रांआव गुफुर जोमैफोरा लोगो जायो गावजोंगाव
ओजों दाउसिनफोरा सोरां होयो खोमसिखौ
उनदै उनदै मोस्रोमफोरा न' लुयो खौसेथिजों
समायना आरो गोजोन दं जेराव
एसे एसे जथाय देंखोजों सुजुजायो खौसेथि
थामोन्थाइ थांनानै थायो
इनायनो समायना आरो गोजोन जायो मुलुगा खौसेथिजों।
17 आगस्ट 2016
सिमां
समायनासिन, नाथाय गिथावनासिन मोनसे मुलुग
इनाय दं आरो दोहोरोमबो दं बेवहाय,
मोजां मोननाय, आरो खारखोमालायनायबो दं,
आं सिमांखौ बेखायनो नुबा हामगौ, नुवाबा हामगौबो सानो।
1 सेपतेम्बर 2016
हारिमु
हारिया जेरै जायो, जेरै रोजाबो-मोसायो
आरो माखौ सिबियो माखौ फोथायो
रंजा-बाजा फालियो माखौ माबोरै फालियो
इसोर आरो सुबुंजों माबादि मा राव रायज्लायो
मोनसे हारि सासे मानसि जानायनि बेनो हारिमु
उदांस्रि दं आरो गैयाबो हारिमुआव।
12 सेपतेम्बर 2016
बिबारनि रादाब
बिबारा गेवलांबोला रादाब होयो गेवलांनायनि
इसारा होयो गावदि गेवलांबाय बेखौ मोदोमनायजों,
बारआ बारबोला बियो फोजावो गावनि मोदोमनाय
आरो अनसाय जानो लुबैयो गावनि गुन मुस्रि;
रंगिना-संगिना मोसाबायो बेरे सिखिरि दाउसिन सेर सेर बिनि।
रैरुब अनजाथाव बयनिबो थाखाय गावदि
आगोमा दानदिसे समनि थाखायल' नाथाय!
दानदिसे समनि समायनाखौनो बियो मुलुगनो खिनथायो
आय'! आंदि बेसे गोथार आरो गुरै होननानै।
बेबादिनो रादाब फोसावो बिबारा जिउ मोनसेनि समायनाखौ।
24 सेपतेम्बर 2016
जोहोलाव
जेननायखौ गनायना लाया इनायनि जाय हेंथाजों
ओनसोलनि हादोरनि उदांस्रि अनफावरि नों
हारि हादोरनि आंगो सुबुंफोरनि गादब जानायखौ नायनानै थानो हाया
ओहो नोङो सहायनो हाया नासय जानायखौ माब्लाबाबो।
लामा नों जोहोलाव हांगामा उदांस्रि गोजोननि,
आरो नों गोहो होग्रा मुगाफ्रोमबो इनाय सुसिग्राखौ फोजोबनो,
उनदै -गिदिर जेबो फाराग गैया नोंनि अननाय लुबैनायाव।
24 सेपतेम्बर 2016
जोहोलाव निलेस्वर ब्रह्म
जोंहा आबै-आबौआ होलांनाय एथबां मेथाइ दंमोनब्लाबो
ओहो जों मानोबा रोजाबथिनो लाजियोमोन!
हारिनि सिनायथि हादोर सिबिनाय आरो मोजां मोननायनि
औ जोंहा गासैबो मेथाइ आरो देंखो दंजायोमोन।
लाजिनायखौ नागारनानै नों रोजाबथिदोंमोन
आरो बर' मेथाइ मुलुगखौ गेवलांसार होनो नाजादोंमोन
उनदै नङा बर' हारिया जोंहाबो गारां देंखो दं होननानै।
नै निलु!
इसोराबो जानो हागौ नोंखौ सोमोनांदोंमोन
लामा नागिर नागिर नोंदि बर' मेथाइखौ मुलुगाव फोसावजेनबाय
एसेबांदि गोहो आरो सोलो दंमोन नोंनियाव…..!
सिमांबो नुदोंमोन नों बिलिफां समावनो साना सोरांबोनाय
अह' जों बयबो सोमोनाङो गमामा नोंनि सिमां
रैसुमै नोंनि गारांआव थारैनो आंगोथिनि सोरां सानआ दंमारो।
बबेनिफ्राइ नों फैयामोन जोहोलाव बर' गामियाव?
रैसुमै मेथाइ रोजाबनानै दानदिसेनो थांफिनबाय नों!
हामा-दैमा नोंखौ दाबो फिन खेबसे नागिरो जों,
मैया मैया नाथाय मेथाइ जानानैनो दाबो थाबाय नों।
29 सेपतेम्बर 2016
गामिनि समायना
गोजोन गोथार सुदेम बार जेब्लाबो
आरो नबथि सेरजों गोगो गोजोङै बोहैलांनाय दैसा-निजिरा
माय दुब्लि आबाद फोथार आरो सोमखोर बारि बागान,
इनायनो रंजाथाव समायना गय खान्थाल थाइजौनि बारि;
नायनो समायना गासै गामिनि हाबा हारिमु फोरबो
इनायनो गोसो गोरबो सुग्लाय होनो हानाय दं बेवहाय।
समायना सुबुं सोद्रोमस्रि
मोसानाय रंजानाय आरो बायदिसिना गेलेनाय
आरो मावनाय-दांनाय खौसेथि सावरि-बादालि
इसोर सासेनि फिसा होननानै साननो हायो जों।
नै आंगोनि आंनि गामि
आं नोंखौ मोजां मोनो बयनिख्रुइबो साबसिनै!
29 सेपतेम्बर 2016
हाजो
हा अन्थाइनि दामोल गोजो गोजो
आरो बेनि सायाव समायना बिफां-लाइफां
जेसेबां गोजोननिफ्राइ नायहरो एसेबांनो समायना नुयो,
ओजों हाजो सिंनिफ्राइ बेसेबा गोथार निजिरा बोहैनाय।
1 अक्टबर 2016
लैथोमा
लामा आरो मुलुग नों ना आरो जिउनांफोरनि
ओजों-हजों हादोर दावबायारिफोरनि जिउनां,
इनाय-अगेन नोंनि बिखायावनो नुनो मोनो।
थांखि नोंनि बिखुं साजों दावबायनायनि
ओजोंनिफ्राइ हजों हानथियारिफोरनि
मा मैया मैया मादि जाथाय नोंनि बिखायाव
आरो मादि जाबावगोन, अननाय दं नोंनियाव…..!
1 अक्टबर 2016
अखाफोर आरो आं
अखाफोर गावदां
खायसो खालामफैदों गले गले गोसोम जोमैफोरा
आरो बियो नारानाथा आंखौ नायहरनो नाजादों।
फै फै होननानै लेंहरनो गोसो जादों आं
ओइदिनखालि आंनि जोनोममोन
रजे बै साननिफ्राइनो नों दाबो दं बेबादि होननानै।
आं अखाफोरखौ नुबोबाय थादों
रैरुब महर एखमबा
ओजों माब्लाबा बोदोर जासेयावबो बियो थाखोमायो!
आं, मानोबा अखाफोरखौ मोजां मोनबाय।
4 जानुवारि 2017
मोनाबिलि
मोनाबिलि!
ओहो नों माब्लाबाबो गोमानानै थाङाखै
ना मेसेंआवनो फैया, ना दैज्लांआवनो?
आंखौ दिनैसिम नोङो खेबसेबो खारखोमायाखैबो।
बेलासि थांब्लानो आंखौ लोगो हमफैदों नों सम मथे
इसोराबो जानांगौ सोमोनाङो नोंखौ,
लागाम गैयै खारनाय गरायाबो थाद'नांगौ जायो
इनायनो सम अनसुलि आंनि आंगोथार नों।
11 जानुवारि 2017
सिखाव
सिरि सिरि लाखोमाग्रा
इनाय खालामग्रा
खावनानै गावनि खालामग्रा
आजां-गाजां दाय आरो गोरोनथि गोनां
उनदै गेदेर थायो गोबां सिखावा।
25 फेब्रुवारि 2017
जिउ
जाजाया-लोंजाया नों फैबाय थांफिनगोनबो
इसोर, आल्ला, खदा नागिरनांगौ मोनाब्लाबो नोंनि थाखाय जोनोम मोनसे
उखैनाय-गांनाय दुखु हांमा लानानै फैयो नों, ब्लद थांफिनगोनबो।
9 मार्स 2017
गोसोम
गुफुरा गोसोमखौ मोजां मोना,
ओजों गोसोमा गुफुरखौ मोजां मोनो,
सना दाग्राया मोजां मोना सिखा दाग्राखौ,
ओजों सिखा दाग्राया मोजां मोनो सना दाग्राखौ,
मोजां मोनलायनाया गोसोम आरो गुफुरखौ लानानैसो जाहामेला।
25 अक्तबर 2017
सम
सैमा सियालनिख्रुइबो सोलो गोरोंसिन नों,
मोसा लख्रानिख्रुइबो गिलुबालुसिन नों।
2 नबेम्बर 2017
जोनोम
जेसेबां थैलांदों, बायदिसिना गोबां जाथायजों
ओजों बेबादिनो जोनोमबो जाबाय थादों जिउ-जिबिनि,
नायथावथाव मुलुगाव दानदिसे रंजादों- गेलेदों
ओनसोल दंनायमानि साग्लोबना थानो नाजादों थांनानै,
मा गोमोथाव हाबानि थाखाय जोनोम मोनसे आंनिबो!
2 नबेम्बर 2017
अनसुलि आइ
अनसुलि आइ, आं जोनोम मोनदों
नोंनि गोरबोनिफ्राइ
सना हिरानिख्रुइबो बेसेन गोसासिन होननानै
उन्दैनिफ्रायनो नों आंखौ फेदेरदों, फोरोंबोदों
लासै लासै नोंनि अननायजों आं देरदों, मुलुगखौ नुदों
इनायखौ गारदों मोजां सोलोंदों, नोंनि फोरोंनायावनो।
आइ, नों बयनिख्रुइबो गोहो गोरासिन
इनायखौ दबथायनो हायो नों, फोजोबनोबो हायो।
12 नबेम्बर 2017
जोमै
जेसेदिन अख्रां थागोन, नोंबो थागोन नामा!
ओजों-हजों गोसारद्लानानै,
मिथिंगाखौ समायना खालामोबो नों
ओजों गुफुर, हजों बायदि गाब गानानै,
इसोरासो मिथिसिगौ नोंखौ मानो बेबादि सोरजिदों!
12 नबेम्बर 2017
मिनिस्लुनाय
मादि मुहिनाय बेयो हायना गोनां,
इनायनो आंनि गोसोखौ आवलि होनाय;
नायहोर नायहोर आंनिबो गोसोआ रंजालु,
इसारा दं मोजां मोन्नायनि बेवहाय नोँनि।
सना नों-
लाजिगुसु जोबोद इनायनो,
उखुमब्रेनि जोमैयाव थाखोमाबायनाय बादि;
नायहर खोमायो नों आंखौ बेबादिनो।
आंखौ नों मोजां मोनो?
यै सैनाय मिनिस्लुनाय खानाय-बानाय।
13 नबेम्बर2017
बेलारोम
बोथोर बोथोर सोलायो महर नोंनि
एंखोर बिरना लाइफांफोरबादि,
लासै लासै जारौ साना हाबलाङो,
आंनि गोसोआव आद्रा थालाङो माबा गोबां;
रजे आरो आंनि रायज्लायनाय,
ओरैबादि गुस्लायलाङोदि गोसोनि खोथा;
मादि गोमोथाव बियो नोंबादिनो गोमालाङो!
14 नबेम्बर2017
गोजोन
गोथार आरो गोदानावसो थायो ना
ओरैनो जेरावबो दं नोंलाइ?
जारलाजों नांलाय-खमलाय आंहा
ओरैनो नांलायनाय गावजोंनो गावनो,
नै लोगो नोंखौ मोनोब्ला सोरखौथो नांबावगौ जाखो?
14 नबेम्बर 2017
सनाथि जाबाय दुब्लि
सानसेबा सोमखोर समायनामोन
नायनो इनायनो मोजांमोन,
आं नायहरोमोन जामफै सेराव गसंनानै,
थाथिरा नाथाय रावनिबो बैसोआ बेबादिनो,
इसोरनि माया होननानैदि बुंदों मानसिफोरा!
जेरैबादि नों लाइमोन बैसोनिमोन
आरो बेबादि जानानै गैलिया नों,
बैसोआ नोंहा बांबाय
आरो नों जाबाय सनाथि गाब, सना बिदां फिथाइजों
इनायनो समायदों नाथाय नोंखौ अब्लाबो।
दैमा-दैसाफोरा गावनि हाबा मावना समजों रानज्रिंलांबाय
उनदै लाइफांफोरा गेदेर जाबाय,
बोराय-बुरैफोरा सान हाबनायबादि आनज्रायलांनो गोनां जाबाय,
लासै लासै बेबादिनो नों सनाथि जाबाय दुब्लि;
इसारा होबाय गावनिबो थांनांगौ समखौ।
1 जानुवारि 2018
लावखार ओंखाम
लाजिनाय-गिनाय, गावजोंगाव बोराबलायनायखौ गारनानै
आरो गोदानै गोरोबलायफिननानै
उनदैखि गेदेर लावखार ओंखाम जादों,
खोनासंथाव मेथाइ रोजाबदों, दामदों माइकआव
आरो मोसालायदों रोंगौबाबो रोंआबाबो, बयबो
रैसुमै बारआबो जौ फेनायबादि मोसादों दैसानि हाद्रि बिरफुंहोनानै।
ओंखाम जानो बावगारलायनाय रंजानाय, खुसिजोंनो
खान्थाल मादा गाब गानानै साना हाबलांगुलायबाय,
आरो अखोरांआव दाउसिनफोरा उरां मारियै मारियै
माब्लादि साना हाबलांखो उदिस गैया रावहाबो।
27 जानुवारि 2018
गथ'
गियाबो, लाजियाबो, मानियाबो बायगर गथ'
थेख्लाय जाबाबो हायावसो दुमफ्ला।
27 जानुवारि 2018
मोखां
मोजां मोनजायो मोखांआव नायनानै,
खांखोर सानजायो मोखांआव नायनानै।
13 फेब्रुवारि 2018
जिबौ
जेरा दं बेवहायनो थाबायथा
इनाय मावनो आगानसेबो दा आवगायबो,
बुथार जागोनबो नंआबा।
ओजों नोंखौ नागिरगासिनो थायो मानसिफोरा
उनदैखि गोरलै थांगोन थखन लानानै
13 फेब्रुवारि 2018
एनजर
एरसोनानै थानायखायसो गुदुंआव
नंआबा फोलेरआनो जोबलांसिगौ
जेराव दं बेवहायनोै थाबायथा दलरै बेखायनो
र' फैथोंलै होननानै जमना दं नोंखौ मावजिया।
13 एफ्रिल 2018
बैसो
बोथोरजों खारफालांबाय थादों आंनि बैसो
ओजोंहाय लोगो मोननाय बोसोर नागारबोनानै,
इसोर, आल्ला, प्रभु सोर सोरखौदि लोगो मोनबोखोथाय….।
सानथ्रनो हायै आगान सुरबोनांबाय आं, थोंनैल' आथिंजों
ओलाबबोबाय न' गोजामखौ ओलाबनाय बादि समफोरखौ।
3 मे 2018
आगान
आंनि उन उन फैफाबाय थादों, आंनि आगान
गेजेर गेजेर बियो आंखौ आनदायदों;
आं बबेजों फैखो, आंबो समाव आनदायदों आगानखौ
नाथाय बेसेबा आंगो आंनि, आंनिनो आगान।
7 मे 2018
अन्थाइ
अखाफोराबो जानो हागौ गोमोहाबो
नोंदि गोरा होननानै गुण दं, मुलुगाव
थांनानै थानायनि थांखि दं ना गैया नोंहा?
आंबो दासिम सोंनानै नायफेराखै नोंनाव!
इसिबां गोहो दंदि नाथाय नोंनियाव, आं मोजांयैनो मिथिगौ।
15 जुन 2018
मोनसे खोमसि
मैया आरो दिनैखौ लानानैनो दासिम
ओजों-हजों जेरैबो दावराव मानसिफोरा,
नांज्लायदाव बाथ्रा दानथेलायदाव, बारासिन जाथारदों
सोरबा बुंदों मैयानियानो मोजांमोन,
एसे सोलाय नांसिगौ होननानै सोरबा बुंसोलायदों।
खोमा गैयैफोरा गोजोनै थादों
ओजों खोमा गोनांफोरा बेबादि थानो हाथाराखै,
मिथिंगाया हरखाबै महर सोलायबाय
सोरां गैजायैफोरा ओरैसो जानो ओरै जानो!
इसोराबो होखारनो हाया बे मोनसे खोमसिखौ!
20 जुन 2018
सिफुं
सिरि मोनगोनखि सिरि मोनगोन थैहाबनाय गोरबोआबो
फुंनि दाउसिनफोर सिरि मोननायबादि सिफुंनि देंखोआव।
20 जुन 2018
बादारि
बोथोरजों खाब जानानै मानसिनि हाबा
आरो बैसोनि देंखो रोजाबनाय
दैसानि अन्थाइफोराबो सिरि मोनो रुवानि सोदोबाव,
आलो आलो बिरबायनाय जोमैयाबो थाद'यो,
रैरुब मोनाबिलि समाव
इसारा होलांओ साना खेबसेबाव फैफिननायनि।
24 जुन 2018
नाफाम
नाफाम होनबाथाय हंख्रदबायथानाय बोरायाबो सिरि मोनो
आसोल बाथ्रायाव बाहागोआदि गोमागोन!
फोजाग्लुंनो हानाय गुनबो दं गामि गंसे नाफाम हारिनाव
आरो अलसियाबो खालामनो हागौ बियो
मा गोमोथाव होनबा नाफाम हारिया!
25 जुन 2018
सोमोनदो
सोदोमस्रिनि मोनसे गस्ला सोमोनदोआ,
ओनसोल दाग्रा,
माय हेनदो आबोर खालामग्रा,
ओजों-हजों हजों दावबायनायनि गोजान दिंग्रा,
न' गंसे थांनानै थायो सोमोनदो जोंनो।
दैमा-दैसाफोरबादि आरो आलो बोहैयो, जुगामि रेगा जायो
ओजों बिनो दिन्थिनानै होयो गोजोन इयुन।
25 जुन 2018
सैमा
सै होनबानो खारलांओ, गुर गुर होनबानो खारबोयो
ओजों ओंखाम मोनजाबासो सिखावखौबो नेयो,
इसोरखौबो सोंगोन सादुखौबो सोंगोन बियो
माहाजोना जेखौ थिनगोन बिखौबो अरगोन
आजां-गाजां सैमानि सोलो, मालाय हालेवनायाव आगान होग्रा।
This poem has not been translated into any other language yet.
I would like to translate this poem