बिफांआव गाखोनानै साना नायहरनाय सिगांनिफ्राइनो जुरिजेनो
उवाल-गाइहेननि सोमावसारनाय
थौसिनि गाबनाय आरो ना बाथोननि मोदोमनाय
खुन्दुं थुननाइ सोरखिनिफ्राइ गेवलांसारो गामिनि सिमां
आंनि गामिया नैजिथाम बोसोरनिफ्राइनो आंजों थाबोदों
आं दा सोलायबाय आंनि गामियाबो
थाइलिर बिथराइबादि लावोनबोनाय आंनि सानस्रिया
सोमखोर गोथां जानानै दा मेथाइ रोजाबनो जुरियो
दाबो आंनि गथ'आ आंखौ बोलाङो जोंनि गोजाम गामियाव
बुथुमखनो हायै सोदोबफोरा अमा फिसाफोरबादि
खारबोयो समनि बिलाइखौ सेलायो
खन्थाइआव लाफा जायाबा गाबो
दा आंहा बयनिबो थाखाय खन्थाइ सुजुनांगौ जाबाय
अनसारजानाय बुंफोरथि आरो
आंगोथिफोरखौ बिखायाव बोजबना लानानै बालाबगासे रोजाबो
गावनि लाथिख' आखायनिफ्राइ दिहुननांगोन
जेराव जामनो रोङै हाथर्खि आरो अखाफोर ओंखारो अखोरां
जिउ रोदा बिसोमफोरनिफ्राइ दोंसे खन्थाइ
आं लिरगोन सेरफांआव जोनोम जानाय बिबारनि बारग्लांनायजों
कम्युनिकेसननि दावराव-दावसियाव जोखोम जानाय
मानसि गोसोनि खुथ्र-खाथ्राखौ हुस्लिमनांगोन
जिउ गैयैबादि सिरि सिरि दावबायनाय समा
खोमा खोमा होस्रिख्रावलाङो आथिंनि थाखाय
सान लैथोआव गेलेनाय सोदोबफोरा
जिउनि सानथौ फोरमायो खौथि खौथि जिथाइफोरनि मेथाइजों
मुलुगा दा गाबो फालि खोबथेनानै
दाहायाव गोजावो बेलुनबादि अखाफोर
बेवहायनो मोगा-मोगि जाबाय आं
फामेनि बिदै लोंनो गुदुं दै आरो हाब्रुनि गेजेराव
दुंहाव लैथोमानिफ्राइ दावबायनाय खफ' जाना
होसोलाङो मेगननिफ्राइ आनदो जालांनाय दाउसिनफोरखौ
आथिंआव गोग्लैनाय सेबद्राइ बुहुमखौ फुवारनो
दा आं गोदान फैसालि सोरजियो खन्थाइनि फाइखिफोरजों
This poem has not been translated into any other language yet.
I would like to translate this poem