जिख्लाबसे लाइजाम: 'रैसुमै'नो 247-282 Poem by Ronjoy Brahma

247
देलाय देलाय फै लामायाव
सुजुगोन सना आं खन्थाइ,
मुं नोँनि मोनाबिलि समाव-
रोजाबगोन बारजोँ हुरा हुरा मेथाइ।
248
बे आंनि मेसेबनाय गैयै मेगनाव
मोदान्नाय नोँनि महरा,
जोँब्लावथोँ मेगना नागिरो माबा
उन्दै हांखो जारौ खावलायाव;
रैसुमै हास्थायो गोथौ गोरबोआव।
249
नुबोनाय उन्दैनि सावगारिया
सानफा सानफा फैयो गोदानै,
मिनिलायनाय मोखांजोँ मोखां समा
फैबाय दिनै गोरबोआव बाना
हालिया नोँनि अनगा लिरनो।
250
नोँखौ लानानै जिउआव
हगारगोन आं दिङा दुखुआव,
हरै मारुंनि गोजोन नागिरना मोकथांआव।
251
बोहैलांथोँ आंनि मोदैया
नोँनि गोरबोआव बाज्ल' बाज्ल'-
नुगोन नोँ गोगो गोथार बिलिरनाय,
बोजबनो सुदेम गोजोन बारआव।
252
दुखुनि बिलोआव गोदोनाय
मोदैया बोहैगोन सानाव लैथोनि,
सुखिनि हाब्रांआव गोसोआ-
नेयो सना सानबाय सानबाय नेना।
253
आंनि गोरबोआव गहेना सनानि
सुजुनाय खन्थाइ मुंथियाव,
सना सिनायगोन नोँ मोखांआव
सोरनि बे समायना बिखानि।
254
गुफुर जोमैनि रादाबा थार
रंजा रंजा लाङो खौरांखौ;
समायना बिखा अखोरांनि-
हालि हालि दाउसिन बिरदावो खुसिनि
नायहरो रैसुमै नोँखौ आं मिनियै।
255
सुहाबनाय सोलेराव निहोरा लुफावो
हांना आखाय अराव मुखुब,
बावगाराखै अब्लाबो नोँखौ-
सानबायो सिरि सिरि ओँथियाव
रैसुमै नोँ बिलिर जानाय फुंआव खुवा?
256
गोदै गेस्रेम रिँखांहोनो
गैया, हायाखै आं देँखो बोहाबनो-
साजायो अब्लाबो गुरै गारांखौ
रैसुमै बोयो मेथाइ फोथाराव
नोँनि आंनि गेजेराव आन्दो आन्दो।
257
सौहैबाय आंनि बोहैनाय रादाबा
नोँनि गुफुर गोरबो सिबायाव,
मिथिया आं आन्दोआव
गोदै रादाब गुसु बाराव
नोँनि आंनि बै रुगुंआव।
258
सानबायो गोरोबनाय गोरबोआव,
नोँजोँ आंजोँ हरै मारुंआव, -
गासिबो मिनिनाय, गासैबो रंजानाय,
नोँनि आंनि साजायनाय दिङानि।
259
थाबायनाय लामायाव नोँनि मिनिनाय
लाजिस्लु नोङो रायदावनाय,
गोसोआव सावगारि हमथानाय
साजायो नोँनि आंनि गोरोबनायनि
रोमै रोमै फैसालि रुगुंआव
नोँ आंनि।आं नोँनि।
260
आंनि सानबायनाय नोँनि
दुखु-सुखु आंनि गोरबोनि,
मिनिनाय-लाजिनाय मोखांनि
रायदाव नुलायनाय नोँनि
आंनि जिउ लामानि हमथुमख' हायै
घोन आंनि जिउनि
सना आंनि बिखा सोलेरनि।
261
जोँमानि आथिँआ मेगनाव गोग्लैदोँ,
गुसु बारा मोसाना बिलिरो
मेगनाव नोँनि सौग्रावनाय महरनि
गोजोनो फुं दिनै सोलेर आरो गोरबोआव;
सिरि सिरि बिखायाव
रैसुमै बोजबदोँ नोँनि गासैबो दिनैनि।
262
माथानि समायना दखना रुबैया
गोजोन होयो नोँनि मुस्रिया,
देलायनाय सेननि मोदोमनाया
बिलिरो नोँनि गोदै गारांआ
आंनि बिखायाव, आंनि सोलेराव।
263
नोँनि गोरबोनि दरखं दरखं
थाङो आंनि रायदावनो गोसोआ,
नोँनि अन्नायनि खोबनाय फर्दाखौ
बुंबायनो सिरि सिरि बोखारनो,
सानबायो ओँथिनि रावजोँ गुमुरनो।
264
आंनि थाबायनाय जोमैनि लामायाव
नोँनि देलायनाय बार जानानै फैनाया
साया-माया साया-माया;
नोँनि रायदाव फैनाय जाखां फैयो-
रैसुमै नोँखौ आं गोबायो।
265
आंङो मोसादोँमोन फाख'नाखं दामै दामै-
जंखायनाय फावै नङा,
बरायनाय ओँथियाव बैसागु;
नोङो सिरि सिरि मिनियो
मा सान्दोँ नोङो,
मिथिया गोसोआ आंनिया।
166
सान हर जेब्लाबो
नंगौ गोथारै-
नोँखौ हास्थायदोँ सिरियै,
रैसुमै आंनि।रैसुमै आंनि।
267
आहुतिनि अर सेराव
बियो सोरजिनि आर'ज सेराव;
गोरबोनि गोथार सान्नायजोँ
सोदोब साजायो गुवार बिखाजोँ-
रैसुमै जुलिया नोँनि आंनि गेजेराव।
268
फांथेनाय नोँनि बिखानि फर्दाया
सानहोयो गोबानो गोथारै,
नोँनि गोरबोनि रोजा त्रिपाला
मिथिनो होआ खुसिनि;
दङ नोँदि आंनि अराय बिखानि
सिरि सिरि सान्नाय लामानि।
269
आं नोँखौ मोजां मोनो
हायाखै बेखौनो बुंबायनो,
सना नोँनोल' फोरमायनो।
270
दिनै बे मोनाबिलियाव
नोँखौ गोसो खाङो सना,
सानो नोँनि आंनि गोरोबनायनि;
फेलेँ नङा जिउ मोनसेनि।
271
दिनैसिमबो थाबाय आं बबायै
लाजिबांसिन सानै सानै-
गैया गैया फोरमायाखै नोँनो,
रैसुमै नोँ बुंगोन?
फै सना सानै सानै।
272
आंनि मोजां मोन्नाया नोँजोँनो
थाबाय थागोन जेब्लाबो,
हेँथा मोन्नाय नङा नोँ?
आंनि गोथौ हास्थायनाय गोरबोखौ;
मिथिया नोँनि गोरबोआ साफिगोन।
273
आं मोजां मोनगोन नोँखौ
जेब्लाबो जेब्लाबो समावनो,
बावगारनाय नङा जोनोमाव;
नाथाय नेवसिगोन नोँ बेखौ?
मानिया गोरबोआ-
नोँ आंनि।नोँ आंनि।
274
नोँ सोँब्लानो आं फोरमायगोन
आं हास्थायो नोँखौ,
नाथाय नोँबो साफिया दिनैबो
मादि मोजां मोन्नाय आंनि-
सिरि सिरि सिरि जेब्लाबो।
275.
गोरबोनि रावा रिँङोब्ला आंनि
नोँनि खोमायाव बिलिरगोन,
नोँजोँ आंजोँ गोरोबबोला
मिनि मिनि जागोन मोखांजोँ-
सानबाय सानबाय दं दिनै गोरबोआव।
276
जाय देँखोआ रिँआखै आंनि
गेबेँ खोमायाव सना नोँनि,
सौहैगोन सानसेदि फागुनाव-
नोङो रंजागोन ना मिजिँआव?
277
दङ बाथ्राया गिदिँना गोरबोआवनो
सानबाय जिउआव जेब्लाबोनो,
फैथोँ बारा बुरखायनो सानसेबा
गोमानाय नङा बानायाव अब्लाबो।
278
दिनै आंनि मोखांआव दोमैलु
नोँखौ सानहाबना अरायनि,
गैया आरोबाव खुवायाव
बिरबोयो खोमसियाव हाद्रिया-
थांलाय-फैलाय सान्नायाव निहोरा
सिदोब सिदोब मोदैया।
279
सान्नायनि दाहारजोँ बुसोम जानानै
हां मोनै लोहाबो सानस्रिया,
गोरबोनि मिजिँआ थैयाखै,
दुखुआव हमथायो मानखौ बोननानै;
रैसुमै, नै सना;
नोँ मा सानो?
280
गोरबो बिखायाव जोमैजोँ बेँदिँनाय
गाबनो लुबैयो सान्नानै
रैसुमै, बावनाय जानाय नङा जेब्लाबो-
मोजां मोनगोन आं नोँखौ;
गोथौनिफ्राय गोथौ-
नोङो मुगैनाय राव फोरमाया।
281
बारजोँ बिलाइ, सिरि सिरि
जेरैबादि मोसायो मेगनाव,
साया-माया मोखांआव मुस्रिया
रैसुमै रायदाव फैयो सान्नानै-
थारै- नोँ नंगौना आंनि?
282
नोँजोँ सावरायनाय लामायाव
दान्दिसेल' सम मोखांनि,
लामानि मिनिस्लुनाय सावगारियाव
नोँनि आंनिल' खन्थाइनि;
जिउनि सानसुथिर बारलांब्ला
लोगो मोनगोन सान्नानै माब्लाबा।