थाइलालि Poem by Ronjoy Brahma

दामा दामि मेगनाव मैखि
बुथेथे सिखार गोदानब्लाबो
फुंनि आलायारनाव-
बेसेदि समायना नुदोँमोन नोँखौ
-
दल बुगासे आंनि बिथायाव
सान नोँनि सोरांआ खारदिङो
बेवहायनो गेलेयो आं
नोँनि आखाय दिन्दौनानै
सा-खोला सानजा-सोनाब
-
नोँ ज्रेमज्रेम दुंस्रेम फैथारदोँ
आंनि लामनाय बिखुंआव
बेसेबांबा अन्थाइ बिखासोबादि
बोलो गोनां मिनिदोँ नोङो
-
बिमानि फिसाय सान्दुंआ
थिँ थिँ- -
आखला गाज्रिथार सानदोँमोन आं
लासै लासै सोनाब फैसालि मोनहैजासिम
-
फुंआव फाइलि गैयै बिबारबादि
मोदान्नायजोँ सिखोमायो जोँमा रोदायाव
माया सोँथेनाय बेफोर गसाइनि
नुवा आखायजोँ फर्दा होनाबो
-
मोनाबिलि मोनाबिलि
सोनाबनि हांसो सिलारिया
गांखं फुवारग्लाब बोथारो-
जाहाब जाहाबबोयो नोङो
-
जोँमा-
नोङो आलायारन फुंआव फैयो
सानसुनि सिरियाव रागा जोँफ्रुयो
बेलासियाव नोङो गिदिँफिनो
लासै लासै सोनाब मोखांजोँ
-
हाथर्खि बादिमोन बेसेबा गोजोँ मिनिनाय
निजोरा बादिमोन बेसेबा खुसि
गोजाव लाङो आं बे दैसाजोँ
आलो आलो सिमां नागिरनानै।