Utok Sa Gugma Poem by Jake Tadla

Sa dihang mingsugod ug kalabog
ang tanang bukog sa dughan
ug ginagukod ang matag dangop sa hangin
inig magkahinay ka ug du-ol
Ug unya nagpabiling ana-a sa akong kiliran.
Sa makadaghang higayon na pud
nga ang mga mata nabasa ug natrapuhan,
apan di' madangaw sa kamot
ang bug-os nga kagu-ol inig ikaw na
ang mapasadaut nga kahimtang
Di' na kinahanglan pang kutawon
ang humok nga unod sa gahing ulo
kay bisan siya di' gayud makasabot
sa katarungan sa nagapitik nga dughan.
Wala na ta'y la-in pang kinahanglang sundon
kun' dili ang pagtiyabaw sa kasing-kasing
nga imong ngalan ra'y wa' lung-i.