जिउनि सल'/7 Poem by Ronjoy Brahma

खौऔ दाउनि देँखो बोनायजोँ
मिथिँगाया सोमखोर जाबाय
अब्ला बोसोर गोदाना फैलायबाय
बैसागु गोमखाङो गामि गामि
-
सालगुरि गामियाव गोमखांबाय
खाम जथा सिफुं देँखो
जामख्रिँ थर्खा गंगोनानि रिँनाय
बयखौबो रंजाहोयो मोसाहोयो
-
बोराय-बुरै सेंग्रा-सिख्ला
जानजि खायै बयबो रंजाखांबाय
गोसो खुसियै बयबो मोसाबाय
हानजा जुथि जुथि खौसेथियै
-
बैसागुआव गामिनि सेंग्राफोरा
मेना मेनि हांगार फुनबाय
खौखाब आरो खावलायाव
बेसेबा नायथावै नायथावै फुनबाय
-
गामिनि सेंग्राफोरा साबदोन सोलोँबाय
गामि गामि बिसोर दिन्थिबाय
दंफांनि सिलाइ बानायनानै
दिन्थिबाय गावलायफ्लानानै
-
बेबादिनो बैसागुआ थाङो
आबादारि सालगुरि गामिनिफ्राय
खुसियै बारदै सिख्लाया फैनानै
दुखुयै लासै लासै थांफिनो
-
बारदै सिख्लाया गामिनि न' उखुम
गय बारि बागानखौ मस्रायलाङो
बिफां लाइफांआ साफेरे सुफेरे
जानजि सोमावना जानजिया बायस्रायो
-
सानसेखालि दारियाया अरन फारसे मोखां जालांबाय
हाग्रा अरन गेजेर गेजेर उरसिलांबाय
हराव बैसां खानानै
मै अमाखौ सिलाइ फाथिबाय
-
हर गेजेर समा साग्लोब फैयो
हरा सिनायनो हायै खोमसि
मै अमा मोसा लख्रा
मैदेर मुफुर गासैबो बेरायो
-
सानाव सानसे उखैहाबना थानानै
हराव आदार जाबाय बिसोर
जाय जेखौ मोजां मोन्नानै
गोसोबायदि नागिर नागिर जाबाय
-
मोसाया मै अमाखौ बारसिन्ना जाबाय
सेसा मै मोसौफोरा गांसो जाबाय
दुलाराइ अरना जुनारनि आगानजोँ गोमखाङो
सोग्रावलायनाय खोमसियाव जिबिया आन्दायो
-
अमाया हा उरखुबाय
बियो आरो रोदा बेदर जाबाय
दुलाराइ लावख्रि अरनबारियाव
जिउ जिबिया मोसाखांबाय
-
बिफां-लाइफां मैदेरा सिफायबाय
बिफांनि बिलाइ फिथाइखौ जाबाय
लामा गैयै अरनाव लामा जादोँ
मैदेरा गाब्र गुब्र हाग्राया लह्रायदोँ
-
सिलाइ लानानै दारिया जमदोँ
सिलाइ गादाजोँ गावहां गावहां
गं मेनाना मैया फैदेरदोँ
थर्स सुनानै दौ गावहरबाय
-
गिनायजोँ मैया फेख्राय लांबाय
आरोबाव बे मैयानो फैफिनबाय
बिफां सानिफ्राय दारिया गावहरबाय
फिन मैया फेख्रायलांदोँ
-
दारियानि नाजानाया फेलेँ थांबाय
मैया फैबावदोँब्लाबो बियो जेनबाय
हरसे बियो बैसांआ उन्दुदोँ
फुंआव ओरैनो फैफिनबादोँ
-
बेसेबा रोजा साननि उनाव
गावनि साब्रै फिसाफोर
बिसि गदायखौ लानानै
फाथाबारियाव खारलांबाय दारिया
-
बेयाव गोदान संसार फाथिबाय
गिबि फिसाफोरा सालगुरियाव थालांबाय
बिसोर बेयावनो गोजोनै थादोँ
गावनि फिसाफोरनो सोलोँथाइ होदोँ
-
बिफा जोलै फिसा होन्नायबायदि
थेफा आरो हारावा फलान जाबाय
बिसोर अरनाव सिखार खालामबाय
मै अमा गावबाय अरननि
-
बेदर फान्नानै संसार खालामबाय
सान हर अरन गिदिँबाय
ओनसोलाव बयबो सिनायगौ
बिसोर सालगुरि गामिनि फलान
-
थेफाहा गासै साब्रै फिसा
बिसोर जोबोद अनलायबाय
बिदा फंबायनि फिसाजोँ गेलेबाय
थांस' फैस' फुं आरो बेलासि
-
थेफामोननि फिसाफोरा फरायबाय
रौमारि गामिनियाव खारबोनानै
सालगुरियाव थांनो हायैनि
खुंगुरिनि फरायसालियाव थांबाय
-
दैज्लांआव अखा सिजानानै थांबाय
दै आरो जाम्बै बारलांबाय
बिमाफोरा सम सम दोनलांदोँ
देलाइना हरदोँ खानाय सिंखावहरदोँ
-
थेफाया जौ लोँग्रा जाबाय
जौ लोँनानै हरावसो फैयो
लोरलां लोरथां फेनानै फैयो
बिसि सुमित्राया जोथोन लाबाय
-
बिखुंआव फिसा बानानै
मोसौ बोरमा खाबाय बियो
गावनि फिसाफोर सम बायदि फोरोँबाय
बेसेबा दुखु खष्टजोँ बिनि साना थाङो
-
सानफ्रामबो फिसाफोर फरायसालियाव हरबाय
ननि खामानिखौ गाव मावबाय
सनजिमाया फंबाय बिनानावखौ लाफाबाय
फरायसालियाव लांफाबाय
-
बियो जयै ज गेलेबाय
गामिनि लामायाव गेलेबाय
जल्दं मल्दं खाबादि
गेलेबाय आसौ बिसौ
-
खारनाय थाखोमालायनाय
रंजायै रंजायै समखौ बारहोबाय
थेफाया सिखारि जाबाय
लावख्रि बारियाव हाबहैयो
-
सम सम मै अमा गावना लाबोयो
बेबादि सान हर गोबां थाङो
फिसाफोरनि नांगौ सुफुंनाय
जानाय लोँनायनि गोबां आंखालजोँ
-
सम सम आंखाला बाब्राबना फैयो
फिसाफोरा लुबैनायजोँ गाबो
फिसाफोरखौ बुरखायनो हायैयाव बुयो
बिसिखौ जोबोद अननायजोँ