जिख्लाबसे लाइजाम: 'रैसुमै'नो 54-99 Poem by Ronjoy Brahma

54
जौमोना बारग'ब्ला बेखौनो
हाथों खोमायाव सारस्रिनो,
बुंगोन नङा फोरमायगोन-
गासिबो गोथौ ओँथियाव।
55
गोरबोआव सिखोमाना दोनो सोदोबखौ
एब्रेयो बियो अराय लाजिनायाव,
रैसुमै हाया फोरमायनो-
नोँनि लामा सोँनाय गैयाब्ला।
56
दिँग्रायनानै दङ लामाया
एब्रेनानै सानो थानो खाथियाव,
हाद्रि जानाय खोमसियाव
सोरबा दङ दरखंआव,
बोलो गैया आखायाव, मोजांल' मोनो।
57
नोँखौ बजबनानै गोरबोआव
सिरि सिरि सानो लामायाव,
थैनायनि बै फैसालियाव
नोँजोँ आंजोँ लोगोआव।
58
एसेबांदिन नुबाय सानाव
माला जाबाय सावगारिया,
बेसेबांदि सावरायबाय
खन्थाइ जाबाय सोदोबफ्रा।
59
नोङोदि खालामो आंजोँ फारागखौ
खोमायाव नांफैयो बारजोँ,
नोङो आंखौ नेवसियो,
थेवबो आं मोजां मोनो।
60
आंनि अन्नायखौ नुवाब्लाबो
बिजिरनो हायो गोरबोजोँ,
नोँनि मुस्रिया बोलाङो खाथियाव
नोँदि सानो नामा गोजानाव?
61
आंहा मोजां मोनो नोँखौ
बेनिखायनो थाङो नायनो खाथियाव,
गिनाया गैया गोरबोआव
लाजिनाय मेवखाङो मोखांआव।
62
हर जाबोला मसेबो आं
नोँजोँ लोगोआव बिबार बारि,
गैया गैया सिमांनि नोँ-
आंनि रानि नङा।
63
बेखौनो बुंगोन आं-
जुदि नोङो सोँबाययोब्ला,
आं नोँखौ बावनो हाया।
64
आं सौंदोँमोन-
माबोरै दं?
बेखौनो नोँ फिनदोँ-
मोजां।मोजांङैनो दं,
आं गोजोनदोँमोन हरसे सान्नानै।
65
नोँनि सावगारिखौ आं नायदोँ,
आं गोजोनदोँ;
नोँनि खौरां लानानै।
66
नोँ लोगो सान्नायाव
आं लाजिदोँमोन,
बेनिखायनो मुंदोँ आं-
नोँ आंखौ आदा बुंफिनदोँ;
आं रंजादोँमोन सान्नानै।
67
आंखौ बावबाय नामा नोँ?
जेबो खौरां गैया,
बेखौ आं बुंदोँमोन;
नोँ लाजिदोँ?
आरोबाव आं सोँफिन्नायाव
नोँ बुंदोँ-
लाजियाखै;
आं सिरि सिरि सानदोँ थारै...।
68
मोजां मोन्नायखौ मानसि
सुबुंङाल' मिथिगौ,
बे नङा;
मिथिँगानि बिफां-लाइफां
आरो...
दंमानियानो थारै मिथिगौ,
नोँबो बारजोँ मिथिबाय,
सानदोँ दिनै गोरबोआव।
69
नोँखौ मोजां मोन्नाया
दिनै लामा आंनि
सोरां आरो खोमसिनि अराय लोगो।
70
बावनाय जाया माब्लाबा
समनि मोनफ्रोम उदांआव,
मेथाइ खनो नोँनिनो-
मोजां मोनो नोँखौ।मोजां मोनो।
71
गोजाम बोथोरनि
गोजाम बिलाइफोरा,
ज्रय ज्रय सिरिलाङो...
सानफ्लाङो आंनि गोसोआबो-
गोमालांगोन नामा?
मोजां मोनहाबनाय मिजिँफोरा।
72
बेनो आंनि मोजां मोननाय
फोरमायनो राव गैया खुगायाव,
मोजां मोनोल' नोँखौ-
गोथौनिफ्राय गोथौसिन।
73
जिउनि गोबां ओँखारनाय सोदोबफोराव
नोँनि मुं ओँथियाव,
बेनो बावनो हायै आंनि
मोजां मोन्नायनि गनाय निजोरा।
74
मिथिँगानि गुसु बाराव
बिलिर जायो गोरबोआव,
मोजां मोननाय बेनो गोथार साजायनाय।
75
नोँनि अननाय मागियो,
नाथाय सिरि सिरि...
नोँनि गोरबोनि लुफावनाय गैया;
गोरबोआव बोजबनो मोनाखै-
सिदोब सिदोब थाजिम
अननाय नोँनिखौ।
76
रैसुमै मोजां मोननाय बे सना
मोदै हुगारो आं गावनो,
मादि जाखो हार्सिङै...
सोरजिनि बे मोनसे सानो गोरबोआ।
77
खौरां लाबोदोँसो नामा-
सानो सिरियै...
बिरनाय आंनि मोखांजोँ
हानजासे दाउसिनखौ।
78
बे आंनि मोजां मोननायखौ
अनसायनाय नङा नोँ?
बेनिखायनो सिरि सिरि।
79
गोसोआव फैयो हरखाब सावगारिया
सानसे लायो सना गोरबोआव,
फै गोरबोआव सिरियै।
80
गोरबो साग्लोब्बाय मोजां मोननाय
सिरि सिरिबोल' जिउ मोनसेआव।
81
दिँग्रायनानै दङ लामायाव
सौसि सौसि थांनो हाया गोसोआ
रैसुमै मोजां मोनो नोँखौ।
82
मोनफा मोनफा नोँनि सोदोबा
माला जाबाय आंनि गोरबोनि,
सुजुयो खन्थाइखौ नोँनि मुंजोँ।
83
आंनि उदां अख्रां गोसोनिफ्राय
नोँ बिरथिँङो हार्सिँङै
बोजबो सना जोमै
गोरबोआव मिनिस्लुनायाव।
84
जेसे दङ आंनि बे गोरबोआव
नोँनि मुं।सिँआव साजायनाय;
मोजां मोनो नोँखौ।बे सोदोब।
85
गोरबोखौ सानना खेवना होदो
हाबलांथोँ मोजां मोननाय सोदोबा,
आंनि हादो हमदांना थारै-
बेखौनो सानो सना गोरबोआव।
86
माब्लादि फैखो सौग्रावना मुंआ
मोजां मोनबाय बेखौनो हास्थायना,
नोँनि अननायखौ मागियो-
बेखौ हमदांना बुंफै खोमायाव।
87
नोँनि अन्नायखौ हास्थायना थायो
खालिबोल' सिरि सिरि सिरि-
रैसुमै जौमोन बैसोनि सिखाव गोसो
- बे आंनि,
गोहो गैया खुसियाव फोरमायनो।
88
आन्दोनिफ्राय जेब्लाबो फोरमायो
फुथिया थेवबो खुगायाव,
लाजिनाय-गिनाय बे मा?
फोरमायो गोरबोजोँ
गोरबोआव सिरियै।
89
आंनि अन्नायखौ नोँनोनो होयो,
समायना नोँनि गोरबोआव बिजिरनाय,
नेयो सना लाजिस्लु खोमायाव आंनि
गोदै रैसुमै सोदोब नोँनि खुगानि।
90
रैसुमै, नोँखौ नुदोँमोन आं-
साजायनाय महर मोखांआव,
बेरायग्लां नोङो खुसियाव
सान्दोँमोन आं नोँखौ गोसोआव
बियोदि समायना आंनि जिउआव।
91
मिनिनानै नोङो लाजिस्लु
जेरैबादि सावरायदोँ आंजोँ,
एरायलांफिन्दोँ दान्दिसेनि उनाव-
मोजां मोनो आं रैसुमै;
सोरजिनो दैथायहरो रादाबखौ।
92
नोँनि मोखांआव गोग्लैदोँमोन
खावलाबसे आंनि मोखांआव,
लोगोसे-
सना बेरलाव मेगन फारनैया।
93
गोसोआ सौसिलांदोँमोन आंनिया-
दाखा जोमै सिँखावना,
रैसुमै साजायना इयुन संसार मोनसे।
94
जौमोननि बारा बिलिरनायाव
सानहाबना बिजिरो गोरबोआव,
सना सानो आं नोँखौल'-
मोजां मोनो।मोजां मोनो मानिया।
95
मिथिगोन मिथिगोन नोँ मिथिगोन
आंनि गासैबो सिखाव गोरबोखौ,
आंखौ सानना नोङो बिजिरगोन।
96
नोँनि मुं मुस्रिया
बिजिरनो होयो जेब्ला गोरबोखौ,
बिजिरना नायो गावनो साननायखौ।
97
आंनि जिउआव नोँनि गोरोबनाया
थाबथायो मोदोम बिगुराव,
एरायलाङो मुं मोनसे फारागआव
बेखौनो नोँ सानो दा नङो गोसोआ।
98
आंनि साननाय लोगो मोनसेयाव,
आंनि लिरनाय दोँसे खन्थाइयाव,
आंनि सौग्रावनाय सोदोब लामा मोनसेयाव,
नोँ रैसुमै नोँ-
मोजां मोनो मुं बेखौनो।
99
नोँखौ आंनो मोजां मोनोब्ला
बेखौ आंनो बोजबगोन,
नोँखौ जिउआव हास्थायोब्ला
बेखौ आंनो साजायगोन,
रैसुमै नोँनि खाफालाव सिन्दुर
आंनो फुनगोन।