जिउनि सल'/5थि हालो दैलो Poem by Ronjoy Brahma

आमटेका हादाना अरबाय
हादान हादान गोबां जाबाय
गामि गामि गोबां जाबाय
आरो गोबां लामा जाबाय।
*
आमटेकायाव हाथाइ फसंबाय
मुंखौ आमटेका हाथाइ दोनबाय
बेयावनो बयबो फैबाय
फाननो लाबोबाय बायनाबो लांबाय।
*
आमटेकायाव नायल'-जाल' दैसा मोनसेल'
सान हर अरायबो बोहैदोँ
बिनि मुङा आमटेका दैसा जाबाय
बेयावनो बयबो दुगैयो
ना हमहैयो गुरहैयो बेयावहाय।
*
मैगं थाइगं आमटेकायाव फानो
मुला मैद्रु लाय लाफा
खुमब्रा लाव जोगोनाद
खान्थाल थाइजौ फिथाइ
बायदि मैगं फिथाइ सामथाइ।
*
बेयाव बांगाल फैबाय
नेपालि फैबाय बेवहाय
हार्सा गंगारफोरबो फैबाय
हाजोनिफ्राय ओँखारबोयो गंगारफोर।
*
हाग्रा गेजेर गेजेर
फाथाबारि औगुरि दैसा बारनानै
देउस्रि रानिखाटा थंब्लेद सान्तिपुर
कक्राझार सहैयो थाबायनानै।
*
अरन हाग्रा सिँखाव सिँखाव
आलासि जाहैयो बेरायहैयो
थेफा थबगांमोना जेरैबो उदां
जेरैबो गुदु लामाखौ सोरखियो।
*
गंगार हाजो सेर सेर
दुब्लि अरन सेरनि फोथाराव
बिसोर मोसौ गुमो
बाथा गेलेयो दाउसिन गावो
खुदिया बांगालफोरजोँ गेलेलायो।
*
हालो-दैलो थांबाय दान
खोन्दो खोन्दो गोबां बोथोर
बोसोर बोसोर थांबाय बैसोफोरा
थबगांआ हाबा खालामबाय मान'खौ।
*
थेफाया जमनागुरिनि सुमित्राखौ
रायथि-नायथि हाबा खालामबाय
बिदा-फंबाय जयैनो संसार खांबाय
गथ' गथाय जानानै जुदा जाबाय।
*
बहेन (हाराव) आबो जुलि लाबाय
जमनागुरिनि मुंनि साबित्रिखौ
सावख्लाया दाबो उन्दै
थेफाया लाफाबाय गावजोँ
बेबादिनो संसारखौ जुरिबाय।
*
निजन मेर्गा कमलामोना
बिफाजोँनो थाफाबाय
उन्दै उन्दै बिसोर बिमाजोँ थाबाय
बिमानि मावनाय दांनाय जाबाय।
*
बेबादिनो लासै लासै देरबोबाय
सावख्लाया सावख्ला जाबाय
थाफ्ला अलसिया जाबाय
उन्दुग्रा लासैयै सिखारो मावो।