दुलाराय ब्रह्म घोरोम आफादनि
गा 40थि जथुम्मा
आमटेका गोजौ फरायसालिनि गेलेग्रा फोथार।
दिनै जोबोद रंजानाय बिखायाव
गोसो खुसि मोसानाय मेगनाव
सोरां आंनि गासैबो साना
जोमै दख्ला दख्लि गासैबो बिरलाङो।
उन्दै समाव खोनादोँमोन आं
ब्रजेनद्र कुमार ब्रह्म मुंखौ
खन्थाइगिरि, रायथायगिरि
गेदेमा लिरगिरि होन्नानै।
कलेजनि बिजाबाव फराय मोन्दोँमोन
ब्रजेन ब्रह्मनि खन्थाइ आरो रायथायफोरखौ।
आरो मोन्दोँ बावैसो गेदेमानि
समेस्वरी ब्रह्म बान्था आवग्रिनाय
'अख्रां गंसे नांगौ' खन्थाइ बिजाबखौ।
दिनै आं गावनि मेगनजोँ नुदोँ
मोखांजोँ मोखां गोग्लैदोँ
नाथाय खानाय गोमोन बैसोआव
बियो दिनै गेदेमाया।
4, पेब्रुवारी,2015 बुघबार
फुंनि 9 रिँगा बाबेननाय सम
बिजाबनि मेलायाव
गेदेमाया गांनैसो बिजाब बायदोँ?
बिजाबखौ लाना मेलानि जौसांआव गाखोदोँ।
आं सान्दोँ सिरि सिरि
गेदेमानि सानस्रिनि रुजुनायाव
आंदि मासे मानबाय रोङै एम्फौ
समानबो जानाय नङा रुजुब्ला।
गोबां खुसि आरो रंजानायाव
दैलो गोदै बिबुंथि गेदेमानि
खोनासंदोँ आं गोसो होनायाव,
खामानि मावनाय लासै लासै
सोलिनानै आरो खामानि
फोजोबनानैबो दान्दिसे।
आं दिनै रोजा रोजा सोरजिगिरिखौ
साबायखर होयो,
मानोना आं दिनै गिबि
आंनि सायख' जानाय
रायथायगिरि होन्ना
जायखौ आं सायख'दोँ।
दिनै जोबोद रंजादोँ
आरोबाव सान्नो गोनां
लोगो मोनबावगोन माब्लाबा?
मानसि मि जुनारनि जिउ
थास' बिलाइनि दैबादि
गेदेमानि बैसोआ गोबां जाबाय
खानाय दारि फुरहाब्बाय
आंदि आरो मानबाय रोङै;
लोगो हमनो आरो माब्रै?
दिनै लोगो मोन्नाय गेदेमाखौ
थोजासे, नंगौ ना नङा?
सान्ना लानांगोन बेनिफ्राय आरो
फैबावगोन सम?
दिनै साबायखर होयो आं
दुलाराय ब्रह्म घोरोम आफादखौ
गा 40थि बोसोरारि जथुम्माखौ।
This poem has not been translated into any other language yet.
I would like to translate this poem