जिउनि दाइरियाव, -2009 Poem by Ronjoy Brahma

1994, आंनि जोनोम
आंहा रोखा नङा गोरबोआव
आंनि जोनोमा जादोँमोन 1994 इं?
साजायनायसो जाबाय
जिउनि नंखाय मोनसे।
जोनोमगिरि आय-आफा
आदा आब' गामिनि गासैबो
गैया गोसोआव।
लिरनाय गैया जोनोमनि अक्ट मोनसे
दिनै बेनिखायनो जाबाय गोरबोआव
हां मोनसे सिग्रोमनाय
थि सानखौ
गैया गैया रोखा नङा? ।
1994 इं, आंनि जोनोम नङा?
गुदि फरायसालिखौ बारग'बायमोन
गेजेर फरायसालियाव गोदान मुं थिनांगौ
जिउनि मोनसे थांखि होसोनो।
माब्ला जोनोम?
बबेयाव जोनोम?
आरो गोबां गोबां...
फोरोँगिरिया सोँदोँमोन
आंनाव-
'जोनोमा माब्ला जाया? '
थं आरो गोबां फोरोँगिरिया मिथिगौ।
जोनोमनि अक्टखौ आं मिथिया
आंदि माब्ला जाया जोनोम?
फोरोँगिरिया गोबाव खालामाखै
गावनि रोखा नङै
गियानजोँ थिबाय
1994 इं जाथावगौ।
दिनै बे आंनि जोनोमनि ना
नंखायै साजायनाय जाखो?
आंहा दुखु दिनै
जेब्लाबो
मानोना आं सानो-
आंदि जोनोम 1994 इं?
गोबां सम रोखा नागिरना
आब्रा आब्रायै सोँबाय आं-
जाय आंखौ जोनोम होदोँ;
नाथाय
रोखा नङा,
आंनि जोनोमा जाथावगौ 1994 इं?
1994 इं, आंनि जोनोम?
आयआ आंखौ जोनोम होदोँ?
जोनोमनि उनाव आंदि
मिनिस्लुदोँ?
आयआ आंखौ मैदेर खोमा
संग्राइयाव फुथुदोँ?
बुरि बुरि आबैमोन
गामिनि बयबो
रंजादोँ दाबि मिनिस्लु मिनिस्लु?
सानसे आयआनो बुंदोँ-
'नोँनि जोनोमा जाथावगौ
1995 सो मोन' ।
जेखियानो जाया आं आयै
1994 इं, बेखौ
हां मोनसे जिउआव खेबसे
जोनोमनि अक्ट गनायबाय।
बे गोरोन्थिया जाथारथोँ आंनि
साजाखौ आंनो बानगोन
जाम्बा-जाम्बि आय आरो
आफाया नङा।
आं गनायबाय,
आं सानना लाबाय,
आंनि जोनोमा जादोँ-
1994 इं, नै नबेम्बर।