बोहैथि-2 Poem by Ronjoy Brahma

आं नोँखौ मोजां मोनो
बेयो मोनसेल' गोफार गोरबोनि
नोँनि गोरबोआव जिलिर हगारनो
नाथाय थोरलौ आंनि
दुरुं आंनि गोसोनि।
आङो बुङोब्ला दुगायै
नोँबो बुंगोनना आंखौ?
आंबो नोँखौ हास्थायो
सान्नायाव गुलाय-गुजाया जायो
आङो जुलि नोँनि रजे।
5
आङो बुंनो हायाखै
आङो नोँनो फोरमायाखै
आङो सानफ्लांना फासि नाङो
आङो गावनो गाव बुथारो
आंनि गोसोआव लोरबां नाङो
गोसोनि खैसाराव नाङो।
जेब्लाबो सानफ्रामबो हार्सिँ आं
आङो जोबोद गाबो हार्सिँङै
उन्दु उन्दु गाबो,
जेब्लाबो हरफ्रोमबो सानो
आंनि बोलोआ आंखौ नारख्लायो
आङो खुवायाव थाबथायो।
आङो गोसोजोँ गोसो बुलायो
हार्सिँङै राव दान्थेलायो।
मा इसे मुहिनि गोनां रजे
सिमब्रे सिमब्रा आं थाङो
खुवा रोजा रोजा खुवा
गोजां बोथोरखौ बारलाङो
आङो गोहो बोलो फोरायो
बेसे लेँहरो नोँ आंखौ
बेयो आंखौ समायना साजायो
आंनि मोन्दांथिखौ आङो
मिनिखुसि साबायखर होयो।
आं आंनि दुखुखौ फेजेनो
आङो आंनि लोरबांथिखौ नारख्लायो
नाथाय मा जाहोन आंनि
आंनि लाजिनाय आंखौ हमथायो
आङो नोँनो फोरमायनो लाजियो।
हे गसाइ!
होदो होदो नोँ बे रजेनो
आंनि सिमांखौ गोसोनि,
आंनि जुलिखौ बे रजेनो
आंनि हाबिलाखौ बे रजेनो
आंनि संसारखौ सुजुनो
आंनि बोदोरथि गोरबो हमथानो
आंखौ बिखायाव बोजबनो
आंखौ गावनि अनहाबनो
बे जिउ जिउ रजेनो
बे आंनि मोदायनो
बे आंनि मोदायनो
नुहोदो गसाइ बे मोदायनो
आंनि मुस्रिखौ बिनो।
6
थिँ थिँ सान्दुंआव
सहायनो हाया सोलेरा,
दुं हाव हाव बोथोराव
थावरिया मोसानो, जिबिया रंजानो;
बिफां-लाइफांनि साया नागिरो।
बेसेबा उसाव बादाव आं
बेसेबा गोजोना गोजोना जायो
थांहां फैहां गोसोआव
गोसोनि साननायाबो दिदोम नङा।
मा इसे मोजां रजे आंनि
सुदेम बेयो जिरायना थायो
गोजोन मिनिसुलु आंनि
सुदेम बार सोलेराव बोजबो।
आङो आवा फावा
थांहां फैहां जाया जाया
गंस्रियो लाजियो नायगोमोयो
गोसोआव साननायाव साहस फैयो।
हाबाब मा इसे मुहिनि आय'
रजे जिउ मोदाय आंनि
आङो मेसेबनाय गैयै नायहरो।
सेकेण्ड सेकेण्ड सम थाङो
गुसु बारा सोलेराव नाङो
जोँमानि थुलुंगा मोखांआव
आंनि आयनायाव मोनसे सौग्रावनाय
आङो जोँमा सानखौ नायहरो
मेगनाव मोदैया ज्राम जायो,
लाजिनाय मोखां जाया जाया
मेसेबना द्रोद द्रोद
लासै लासै लासैयै
मानबायलाङो आं रजेनि सेराव।
जोबोद लाजियो जोबोद खोमसि
मोदैया अखा दोमैलु महर
बोलो गैया गैया आंनि
आं जिरायो सेराव रजेनि।
आंहा राव गोमायो
गासैबो साननाया थाखोमायो
नाथाय आं गाबो
आं फोरमायगौ फोरमायगौ सानो
मोदै गसरबोयो रजे आंनि
आय' बियो नायगोमोयो आंनि।
हे गसाइ!
हो रजेनो बे मोदैखौ
बे रजेनो सिनायनो आंनि
दुंब्रुद हास्थायनाय गोरबोनि
हो बुजिनो बे रजेनो आंनि
दान्दिसे आङो गोदोहाबो
गाबै गाबै आङो सानहाबो।
राव गैया आङो बबि
नाथाय आं नुयो रजेनि मोखांआव
बियो माबा बुंहां बुंहां
नाथाय बहा समा थांदोँ
आङो गाबदोँ आरो गाबदोँ
सोदोब गैयै हां बोयै हां।
आय' सना रजे आंनि
नोँ मादि सानो आंनि
नाथाय आं हाबिला
बुं रजे जिउ नोँ आंनि
नोँनि गोरबो गोथार
बोला बिलाइ बोला।
आङो सान्दोँ गंस्रिनानै
सिमा गैयै निजोरा गोजावनानै
नोँनि अनगा आंनि संसार गैया
नोँनि अनगा आंनि जिउ बहा?
नाथाय रजे नोङो मुखुब
मादि सान्दोँ मिथिया आं
बिफां सायायाव आलांगा जिरायना
आंदि नोँनि सेराव
गासैबो सावगारि बावहाबना।
आङो नाख्रेब जायो
आङो बांसिन गाबो
मेगनाव मोदैया थरथिँ थरथिँ
गसरो गोगो साननायाव।
आङो हमथा हाया
बुरखाय हालिया गोसोखौ
नोँनि आखायाव आंनि आखाय
बिलिरो आं अननायजोँ,
नोङो हुस फैयो, आंखौ नायो
आंनि थरथिँसे मोदैया
नोँनि आथिँआव खुदुमो
नोङो सना नायगोमोयो
नोङो जानो बिजिरनो लायो।
आं बबि जायो
आं सिरियै गाबो!
फोरमायनो हाया बोलो फैया
हमथायो आंखौ लाजिनाया।
आय' सना जिउ मोदाय
नोँनो आंनि थैनाय-थांनाय
बागदाव खांनाय नोङो बुङो
नोङो सोमोनांनाय मोखांङै
- रैसुमै, बेयो मानि मोदै?
नोँनि गाबनाया सोरनि?
नोँनि आखायनि ओँथिया?
आं बुजिस'नो हाया रैसुमै
नोङो दिनै आंनि सेराव
मा हास्थायो मा लुबैयो
आंनि गोजोनै सेराव?
रैसुमै, नोँ मा नागिरो?
जोँब्लावनाय नोँनि मेगन आंनियाव,
नोँनि मेगननि मोदैया
बोहैबोदोँ फावदुर खावलायजोँ
बेयो मानि गाबनाय
रैसुमै नोँनि मोदैया
आंनि आथिँआव थरथिँसे
बेनि ओँथिखौ नोँ बोरै फोरमायो?
नोङो सिनायो आंनि सेराव
नोँनि सिनायथिया आंनि सेराव
नोँहा मा बुंनांगौ दं रैसुमै?
आंनि आरो मा मिथिनांगौ दं?
नोँ आंनाव मा सोँगोन रैसुमै
एबा नोँ मा फिनगोन?
आं बुजिस'वा रैसुमै
नोँनि जेबो आङो मिथिया
अदेबानि नोँबो आंनि गोबां मिथिया।
आङो गाबो मोदै गयो
लाजियो मिनिसुलुयो
गाबब्रुं थेरो गारमाया
आङो बुङो- आदा! बुंनांगौ दं,
- मा बाथ्रा बुं नोँ
गाबनायनि मा गोनांथि?
मा गोमादोँ नोँहा-
नंखायै गाबनो?
बुं रैसुमै, आं खोनासङो।
मोदै गसरो रजेनि आथिँआव
आङो लासै बुङो-
रनजय आदा! दं बुंनांगौ बाथ्रा
नाथाय लानांगौ आरो
आजावनांगौबो दं,
जेबो आंहा गोमायाखै
नाथाय आदा गोमागोनबादि,
नागिरबाय आङो सिरि सिरि
नाथाय मोनाखै आङो
बेनिखायनोथ' रजे आंनि मोदैया
नोँनि आथिँआव गसरनाया।
- आङो बुजिस'वा
बाथ्राखौ दाफोलाव रैसुमै,
कलेजनि समा जोबलांगौ
सान हाबनायनि सिगां सिगां।
आङो बांसिन लाजियो अब्लाबो बुङो
फंसे रावआ गोमायो
नाथाय मोनसे ओँथियानो
- बेसेबा समायना आदा
रिगि रिगां बाहां बिरहां
जेब्लाबो बिरथिँ बायदोँ।
गोरबोआ हास्थायो आदा
नोँनि आंनि नोँनि-
आंनि गाबनाया नोँनि थाखाय
आदा! आंनि मोदैया नोँनि थाखाय।
जिउनि मोदाया लाजियो
बियो गंस्रियो हरखाबनो
नाथाय दान्दिसेल' सानहाबो
बियो बुङो लासै लासैयै
- बेयो साननायनिल' हां
बेयो सानबोलावरि रैसुमै
बेयो सिमां सिमां
बियो मोकथां नङा
नोँ गोसोखौ दांग्रोम
नोँ सिमां नुदोँ रैसुमै
नोँ मेगनखौ बिलिर
गुसु दैजोँ खेबसे सुस्र'
नोँ बुजिगोन रैसुमै
बेयो मोनसे गोरोन्थि।