अरननि दाइरि 2.05 फलाननि आखायनिफ्राइ Poem by Ronjoy Brahma

285
फलाननि उन उन थांफानायसै रुम्बांआ
फलाना एसे सिगां सिगां,
लाजिनाय गिनायखौ गारनानै
गावनि दखनाखौबो गानाखिसै रुम्बांआ।
286
फिसा जलंगायाव सोनानै लादोँ दखनाखौ
बेसेबा गोजान थाबायलांबाय,
अरन गेजेर गेजेर थांबाय
रुम्बांआ मेँनाय उखैनाय बावलांदोँ।
287
अरन सौसि सौसि उनाव
बिसोर दाउथु हाजो मोनहैनायसै,
मोनसे दन्दराव बिसोर जिरायो
फलान खुसियै नायदोँ रुम्बांखौ।
289
गोसो सिँखाव सानस्रि आबेगदोँ बुंनाय
फलाननि मिज्लौ मिज्लौ मेगन,
बेसेबा गोमोथाव नायबाय बियो
आरो नायबाय थानोबो हायाखिसै।
290
लुबैसुला गोसोखौ लानानै बुंबाय फलाना-
''मा मुं जारौ नोँनिया?
बेबादि जोँ सानैल' समाव
नोँ आंनिफ्राय जेबो लुबैया दा?
291
जायखौ नोँ माब्लाबाबो मोनफेराखै
बेबादि नोँ हास्थाया दा?
आं नोँनो होनो हागौ सना
नोँहा गोसो गैयै नङाना? ''
292
रुम्बांआ अब्ला बुंनायसै-
''आं लुबैयो ओरैबायदि-
आंनो नोँनि मदद नांगौ
आंखौ मदद खालाम इसोर।
293
जाय सानसिम आं माब्लाबाबो
बेबादि खैफोद मोनफेराखैमोन,
नोँ आंखौ मदद खालाम अन्नानै
आं मोनसे मुवा दान होगोन।''
294
खुसि मिनिसुलु मोखांजोँ
फलाना लासैयैनो सोँनायसै-
''बियो माबादि दान?
आंहा मिजिँ दं थारैनो।''
295
रुम्बांआ आरो बुंनायसै-
''आंनो नसिम दोनलां,
आरो आं नसिम सहैयोब्लानो
आं दानखौ नोँनो हरगोन।
296
फलाना बुंनायसै अब्ला-
''आं बेबादि दानखौ लुबैयाखै सना''
रुम्बांआव आरो सोँनायसै-
''माबादि दानखौ लुबैयो बिदिब्ला? ''
297
लुबैनाय गारांजोँ फलाना बुंबाय-
''नोँनि सोलेरखौ सना,
बे अरन गेजेराव खेबसे-
आं नोँखौ गोजोन खालामगोन।
298
दान्दिसे सानैजोँ सोर्गोआव बिरबायगोन
नोँखौ आं आंखौ नोँ,
सानैजोँ अन्नायखौ होलायगोन
आं नोँखौ दोनलांगोन सना।''
299
रुम्बांआ अब्ला बुंनायसै-
''नोँ आंनि बैसोआव बिफासो जागोन,
बेबादि इनाय दासान आदै
सयथि फाफ नांगोन।''
300
गाबनो हमबाय रुम्बांआ
गोसोजोँ गोसो सानबाय बियो,
ना गथायनानै होनोसै?
आं नसिम सहैयोब्लानो जाबाय।
301
नाथाय नआव सहैयोब्ला आंनि जुलि
सासे नायनो मोजां सेंग्राजोँ,
आं खालाय जानानै थांब्ला
फिसा मिथिया लासेनोखि थागोन?
302
थैनाय समसिम बेसेबा गोबाव संसार
आंखि बिनो खिन्थाया लासे थानो हागोन?
बियो आंखौ सैया सैया खालामगोन
नाथाय गथायनानै होब्लाबो?
303
ओहो थांनानै थानायनि
जेबो ओँथि थानाय नङा,
बियो सासे बोराय मानसि
फलान मानसि जेथो गोसोआ।
304
आं बेखौनो गोसो खांफ्लांगोन
जिउ मोनसे सुखु मोन्नाय नङा,
आं गथायनानै होनो हाया
नांगौब्ला आं थैगोन।
305
आं जुजिनानैनो थैगोन
जुजिनाया मानसि जोनोमनि देरहानाय,
बेबादि सानबाय थानायावनो
फलाना रुम्बांनि खाथियाव साफिबाय।
306
जेबो मोनथारिलाय हाग्रानि बिलाइ गोरानजोँ
फलाननि मोखांआव सारलाबाय,
बिनि उनाव खारनायसै रुम्बांआ
फलाना बेँफोरखौ बोखारबाय।
307
रुम्बांनि जलंगाया थालांबाय
फलाननि गोख्रै हमथानायाव,
उन उन फलाना होसोलांबाय
गावनि गासैखौबो दोनथ'नानै।
308
गोबां उखैनाय मेँनाय रुम्बांआ
खेबसेबा गोग्लैबाय सौथुबाय,
फलाना खेबसेबा बारसिनबाय
एखमबा खुबैना खारजादोँ।
309
बोरैबा उनथिँ नायहरनायाव
दंफांआव थर सौदावबाय रुम्बांआ,
बियो हायाव जल्दब गोग्लैबाय
लेथ्रा जायगायाव रुम्बांआ थैहाब्बाय।
310
जायगाया जोबोद लेथ्राथार
मोनसे जायगायाव लांबाय फलाना,
बियो रुम्बांखौ हायाव दोन्नानै
खुसियै बारसिन्नो नागिरबाय।
311
हरखाब मैदेरा हमख्रब फैबाय फलानखौ
आरो हायाव गोसायै खुफ्लेबाय,
बाब्राब बायदोँ फलाना
दान्दिसे उनाव बियो थैबाय।
312
खनखांनानै आरोबाव बहाबा
फिउ गारहरदोँ फलानखौ मैदेरा,
अरननि सियालफ्रा खारबोनायसै
फलाननि सहखौ रान्नानै जानायसै।
313
बयबो खुसियैनो मोसानायसै
जुब जुब अखा दामब्रा हानायसै,
अख्रांआव दाउसिन दाउलाफ्रा बिरबायनायसै
गावसिनि बासायाव एब्रेफिन्नायसै।
314
मोसा लख्राया देरहासाथ हब्रानायसै
मैदेर फालोआ रंजानायसै,
दान्दिसेयावनो अखाया हागाबाय
सोनाब फैसालिनि साना साबायखर होबाय।