अरननि दाइरि 2.04 सिलाइनि सोदोब खोनानानै Poem by Ronjoy Brahma

255
फलाननि गुलि हगारनाय सोदोबखौ
गाम्बारि बागानाव नागिरदोँ रुम्बांआ,
लोरलिँलिँ बियो बोलो गैलिया
बेसेबा उखैनाय आरो दुखु।
256
साना थिखिनि मोनलायब्लाबो
फलाननि आगान संना मोनाखिसै,
बेलासि सम जाब्लासो बियो
अरनाव थायनैसो आमलाइ जानायसै।
257
बिनि उनाव थाबायै थाबायै
गिरि दैसायावनो सहैदोँ बियो,
सोमोनां गोदान सावगारि
रुम्बांआ खेबफा थाबायना जग्रबदोँ।
258
मैया बे दैसानि सेर सेर
रुम्बांआ बेसेबा खारदोँमोन,
बेखौ दिनै गोसोआव गैलिया
गोसो खांनो हालिया बियो।
259
लोरबां आरो उखैनायजोँ
गोबाख्रब जाबाय बाग्राय जानाय,
दुखुनि लैथोआव गोजाव गोजाव
गोसो खांनो गियान फैलिया।
260
दैसायाव खुगा सोमब्रनानै
ग्रद ग्रद गांगाजासे लोँनायसै,
दान्दिसे अख्रांखौ नायहरनायसै
सोरगिदिँ नायहरबाय बियो।
261
दान्दिसे उनाव दैसा सेरनि
बिफां सायायाव दलरै जिरायनायसै,
बेसेबा लोरबां देहा आरो गोसो
बेसेबा गाबनायसै बियो।
262
बिफांनि दालाइयाव दाउ खौऔआ
खौऔ खौऔ गाबनानै रायदावफैयो,
रुम्बांआव गियान मोनखांनायसै
गोसोजोँ गोसो साननो हमबाय।
263
नै बैसागुआ सफैबाय
बियो गोसोखांबाय गावनि बाथ्राखौ,
देग्लाइ जुलिनि बाथ्राखौ
रुम्बांनि जुलिया देग्लाय जागौमोन।
264
दिँख्रिमारि गामिनि आजोला औवारिजोँ
रुम्बांनि जुलिखौ थि खालामबायमोन,
बेसेबा रैसुमै खुसियै
बैसागु बायब्ला रुम्बांनि जुलि जागौमोन।
265
गामिनि बयबो होरलां होरलां
जौ लोङै लोङै मोसागौमोन,
हाबानि बेम फाथिनि मेथाइ
बेसेबा एवखां-सावखां खालामगौमोन।
266
जुलिनि ललिनायजोँ रुम्बांनि मेगना
हौवा गोदानजोँ नायदेरलायना,
अखा मोफ्लामनाय बायदि लाजिस्लु जागौमोन
बेसेबा समायना जागौमोन।
267
फारानि सैमाफोरा उदै बेदां बेदां
ओँखाम खालाय बेदर जागौमोन,
खायेँ-खुयेँ गोमसारलायनाय
बिसोर दान्दिसे अरलायगौमोन।
268
रुम्बांआ गोसोजोँ सानदोँ-
दिनैबा आंखौ बहा सानदोँ?
नागिरदोँना नागिराखै जाखो?
ना बिसोर आंखौ बावलांबाय?
269
गोसोजोँ गोसो सानदोँ रुम्बांआ
आरो मोदै हुगारना गाबदोँ,
बिमाफाखौ जोबोद गोसोखांदोँ
गामिनि लोगोफोरखौ गोसो खांदोँ।
270
नाथाय राहा गैलिया
बे अरननिफ्राय माब्ला माबोरै,
बारगलांनो हाबावगोन रुम्बांआ?
बे अरनखौ सौसिलांनो हागोन?
271
सानै सानै उखैनायजोँ
गोसोनि मेँनाय आरो सोलेरनि मेँनायजोँ,
दुमफ्ला उन्दुलांदोँ रुम्बांआ
गावनि दखनाखौनो गांलाब बनानै।
272
दान्देसे समनि गेजेरावनो
बियो सिमांबो नुदोँ मोनसे,
जेब्ला गाम्बारि अरनखौ बारनानै
सोनाब फारसे थांगासिनो थाङो।
273
बिनि उनाव मोनसे दैसाखौ मोनो
बे दैसानि मुङानो मिनिसिरि,
खुसियै मिनिसिरि दैसायाव
रुम्बांनि बिमाफाया नेनानै दं।
274
गाम्बारि बागानखौ बारलांनानै
मिनिसिरि दैसासिम सहैदोँ रुम्बांआ,
लोगो लोगो रुम्बां बिमाफाया
बेसेबा खुसिजोँ हब्रा हरदोँ।
275
गावबो हब्रादोँ रुम्बांआ-
''आयै'' होन्नानै खेबसे,
सिरि मोनब्ला सासे फलाना
रुम्बांनि उन्दुनायखौ रायदाव फैदोँ।
276
रुम्बांआ बेरला-बेरथायै
गावनि दखनाखौ जोमग्लुबदोँ,
लान्थिया मोदोमखौ खोबदोँ
फोथायनो हाया हाया नायदोँ बियो।
277
रैसुमै गारांजोँ फलाना सोँदोँ-
''नै बिनानाव सोर जाखो नोँलाय?
बेबादि अरन गेजेराव-
मानो बेबादि उन्दुबाय थादोँ? ''
278
रुम्बांआ गल' गल' नायदोँमोन
बिनि खुगायाव राव ओँखाराखै,
फलाना सोँबाय आरोबाव-
''नै नोँ मानसि नंगौना नङा?
279
नोँ मेदाय नामा?
ना अरननि सिख्रि सिख्ला?
बेबादि अरन गेजेराव
आं दिनै मानो नुखो? ''
280
लोगो लोगो गाबनायजोँ बुंबाय रुम्बांआ
''आं मानसि!
आं मानसिसो आदा
आंखौ रैखा खालाम!
281
आंखौ नसिम दोनलां
आं अरनाव हरथाम जाफैबाय आदा!
नाथाय नआव थांनो लामाखौनो
दिनैसिम नागिरना मोनाखिसै।''
282
फलाना मोखां बिलिरना
मिनिसुलु जाबाय आरो बुंबाय-
''जिँगा दासि आं नोँखौ दोनलांगोन
नोँ दागाबसै फै।'
283
बेबादि होन्नानै फलाना
रुम्बांनि मोदैखौ हुगारना होबाय,
रुम्बांआ जिरायनायनिफ्राय सिखारबाय
बिनि मोखांआव एसे मिनिनाय।
284
फलाना सिगां सिगां थाबायबाय
रुम्बांआ बिनि उन उन,
गिरि दैसाखौ बारनानै
बिसोर हानजा दाउथु हाजो फारसे थांबाय।