जिख्लाबसे लाइजाम: 'रैसुमै'नो 148-195 Poem by Ronjoy Brahma

148
खेबसेल' खुदुमनायजो गावखौ
गोजोन्नाय मोनो गोजोन्नाय मोनो,
रादाबा सिरि सिरि
- गोसोनि साननायाव।
149
जिउआव थाखोमादोँ बे मोनसेल'
जौमोननि बासा गोरबोआव,
मोजां मोननाय आं नोँखौ।
150
नोँ गावखौ बुजियाखै,
खौरां लानाय आंनि नोँखौ-
मादि सानदोँ सिरि सिरि-
नोँनि आंनि इयुननि।
151
नोँजोँ अराय सावरायनायखौ
थिसनबाय गोरबो दाइरियाव,
मादि समायना मिथिँगायाव,
मोजां मोनो आं नोँखौ।
152
निहोर सिग्लाबनाय गोरबोआव
बेजबना लादोँ साननायखौ-
नोँ आंनि।नोँ आंनि।
153
नोँजोँ सावरायनाय बाथ्राखौ
आरो बावनो हालिया,
मोनफिनगोन आं गोरबोआव-
नङाब्ला आंनि दाइरियाव।
154
माबोरै फोरमायनो साननानै
थाफिन्दोँ आं बिजिरनानै,
नोँदि सावरायदोँ मिनिस्लुयै
आंजोँ-
नोँदि लाजिनायाव थागोन सिरियै।
155
आंनि गासैबो नोँनो
बावदोँ सिरि सिरि सिरि-
मोजां मोनना; साननानै अरायनि।
156
बाथ्राखौ फोजोबनो हायाखै खुसियाव
रैसुमै सना-
सावरायो लाजिस्लुनाय सोदोबाव,
आंनि बेरखांदोँ गोरबोआव
रंजानाय मोनफा मोनफा ओँथियाव।
157
गिदिँबायो नोँखौ लानानै
साया माया, साया माया
मुहिनां गासैबो मेगनआव।
158
बेरखाङो गासैबो मेथाइयाव
- गोरबो खन्थाइयाव आबुंङै,
रैसुमै सोदोब गोरबोआव।
159
मिथिगौ आं गासैखौबो
मानिनाय गैया जौमोना,
मोजां मोनो नोँखौनो-
सिरि सिरि सिरि।
160
जाय आंनि खोमायाव रिँङो
मोजां मोनो बेखौनो बिजिरना,
रैसुमै मुं नोँनि गोरबोआव
रिङो जेब्लाबो रिङो।
161
नोँनि अननायखौ मोनाब्लाबो
मोनदोँ आं रादाबखौ,
- मोजां मोनो नोँखौनो जिउआव।
162
लाजिब्लाबो गले गले नायफ्लाङो
जेराव-मेरावनो नोँखौ नुयो;
गोसोआव मोननो हास्थायो।
163
साननायनि गोमो-गोथां
जायख्लं सावगारियाव
गोदोहाबो आंनि गोरबोआ,
जोमै सिँखावना बिरलाङो-
बार जाना गोजोन बिलिरो,
नुयो सना साया माया मेगनाव।
164
जोबोद गोहो लानानै नोँनि सेराव
गासै आंनि मोजां मोननायखौ
सानो आं बेखेवना फोरमायनो,
नाथाय नोँ साफिया हार्सिँङै।
165
आंनि लाजिनाय गोरबोआनो
लाखोमाना दोन्दोँ आन्दोयै जेब्लाबो,
आं सानो फोरमायनो-
रैसुमै आं नोँखौ हास्थायो।
166
जानो हागौ नोँनि थाखाय
सानबोलावरियावनो आं-
सानस्रिबाय थादोँ मुखुबथियाव।
167
आं मिथिगौ-
आंनि थाखाय नोँ
- माबा सानो नङा,
अब्लाबो आंनि हास्थायनाया गोथार।
168
रैसुमै, नोँखौ आन्दोयै
- मोजां मोनखोमानायानो
आंनो अराय समाव गुबुननि-
बाफबफैनाय सोदोबखौ खोमादोँ।
169
आं मिथिगौ-
आं नोँखौ मोजां मोनो,
बे बाथ्राखौनो आं दोनखोमादोँ
सिरि सिरि सिरि।
170
आंनि गोरबोआव हाबना नायब्ला
नोँ नुगोन सना-
आंनि गासै गोरबोआव गलिनानै
नोँनि गोरबोआव बोहैनो
लामा नागिरदोँ।
171
गोरबोआव बोहैनाय मोदैया
लुफावदोँ जेब्लाबो सानहाबनाय,
खन्थाइ बेयो रमान्सनि।
172
जेब्ला नोँङो आंनि गोरबो हमदांङा
थागोन अब्लासिम आन्दोआव;
मोजां मोननाय बेयो जौमोननि।
173
मोजां बिबारनि बारियाव
जेब्ला बेरायो सिमांङाव
नोँखौ गोसोखाङो आं हरखाबनो,
गैया सिमांङावबो लोगो मोना नोँखौ।
174
आंनि मिनिस्लु मोखांआव
आंनि रंजालु गारांआव
नोँ मोननाय नङा सानफ्लांना-
आंदि सिरि सिरि मा हास्थायो।
175
सोदोब बह्रा रमान्सनि लैथोआव
गोजोनना थानानै जिउआव
मोनबाय आं फोरमायस' हायै-
दोरफो दोरफो खामग्लिनाय बिखा,
राननो रोङै गोरबोआव मोदै,
फुवा फुवा निजोरा बोहैनाय।
176
आंनि नोँखौ मोजां मोननाया
- सैथोबादि समायना,
नोँखौ गोथार गोरबोजोँ हास्थायनायाव
माबा साननांगौ एबा लाजिनांगौ दं
- होनना आं सानाखै।
177
आं नोँनो खुगा खेवनानै फोरमायाखै-
बेसेबांदि आं मोजां मोनदोँ;
नाथाय गोरबोआव
नोँनि रादाबा जेब्लाबो-
थांलाय फैलाय खालामदोँ।
178
आंनि अन्नायजोँ बुंफबनाय बिखायाव
नोँ नुआखै साजायनाय,
बे अननायखौ आं सानो-
नोँनो होनो,
नेवसिनाय नङा जुग जुगामि।
179
बेयो जौमोननि मोनसे आन्दो हास्थायनाय
फोरमायनो हायाखै खुगाजोँ;
सिरि सिरिल' फोरमायो मिथिस्लाबै।
180
नोँनि हायनानि सारफावनाय सोरांआ
आंखौ मुहि होयो मेगनाव,
मोजां मोनो आं।मोजां मोनो।
181
नैबे आंनि गोरबोआव
दाखा दाखा जाबाय थैसाम,
नोँनि मुं मुस्रि एब्रेना।
182
बिखा बुंजासे अननाया
गलिदोँ आंनि गोरबोआव,
लामा मोनाखै एब्रेनो नोँनि-
थेवबो नागिरो लामा नोँनि।
183
मिथिगोन मिथिगोन नोङो
आंनि राव फाव गासैबो,
सान्नाय होन्नाय गुमुर-
आंदि नोँखौ सिरि सिरि।
184
जेरैबादि थायो आं सानहाबना
गोरबोआव नोँनि अननाय मागिना
होदो आंनो नोँनि-
अननाय गोरोबनाय गुमुरखौ।
185
सोर मिथियो आंखौ?
नोँखौ हास्थायनाय सिरि सिरि-
निजोम सानसुथिर समाव
- दान्दिसे सानहाबो गोरबोआव।
186
जेसेबां सानो फोरमायनो
हमथाफिनो बोलोगोरा लाजिनाया,
हांमानि दैसा सेरजोँ हार्सिँनो
एरायलाङो सिरि सिरि सिरि।
187
लैथोनि फेँफोनाया खुसियाव
जेरैबादि रंजायो बिखायाव,
आंबो सना नोँनि मुस्रियाव
आंनि मिथिँगानि गोरबो बिखायाव।
188
नोँनि गारांजोँ सिरि मोनो आं,
नोँनि मुस्रियाव सानहाबो।
189
नोँखौ मोजां मोननानै
गोमाना थाङा रादाबा,
हार्सिँङै गेवलांनाय बिबारा
लरहायलाङा हार्सिँङै खुसियाव।
190
दिनै मादि साजायनाय मेथाइया
नोँ आरो आंनि-
मिथिया नोङो ओँथिखौ
आंनि साजायनाय खबामखौ
थाखोमाना दं नोँनि आंनि।
191
सान्नानै गोदौनाय सोलेराव
रुख'जादोँ सोदोबा खन्थाइयाव,
ओँखारबोयो गासैबो ओँथियाव
साजायनाय खालिनि बिलाइयाव।
192
दिनै लाइमोननि दखना रोबैयाव
मोदोमनाय बाफबदोँ सोलेराव,
बिरफायाखै गोसोआ बोदोराव
सान्नाल' लादोँ साजायनाय इयुननि
रैसुमै आं सिरि सिरि।
193
नोँनि फांदां बिखानि अख्रांआव
गोबानो सानो गोसोआ,
नोँनि गोरबो गुसु बिलोआव
गोजोमनो सानो सोलेरा;
सना मिथिया थेवबो बिलिरनाय।
194
जारौ गुसुथिनि रिमोन्नाय
बोथोरनि मेथाइ दाउसिननि,
आंनि खोमायाव देँखो मोनसेल'
रैसुमै सिरि सिरि हास्थायो
मोजां मोनो नोँखौ जेब्लाबो।
195
हाथ'फ्ला जानाय नङा आंनि
- गासैबो समाव हास्थायनाय
बोहैबाय दुंब्रुद निजोरा बिखायाव।