गोरबो इसिँनिफ्राइ- 125 Poem by Ronjoy Brahma

दिनै दैज्लांआव नै गिरि
दिनै दुब्लियाव नै अनसुला
मेँग्लियो मेँग्लियो आं मुखुबाव
नोँनिनो आंनि गिदिर हाबायाव
-
आरोबाव गोहोनि थाखाय नङा
हे अबं आंनि आर'ज
नङा गसाइ बारग'नाय हाबानिफ्राइ
नै मानिजाथाव बोखारहर आंनि
होस्रांहर बहाबा मेँग्लिनायखौ
-
सुदेम बार मोसाहोनानै
गोजोन अखा सास्रिहोनानै
आवगायहो आवगायहो आंनि हाबाखौ
-
लोगोआव नै फै लोगो
बार जानानै अखा जानानै
फै फै आय' नै नोङो
मोसा मोसा हाबा आंनि नायनानै
फै बिलिर बिलिर नोङो-
हे लोगो नोङो थुलुंगा होनानै
-
थायो सोरां नायहरनानै
मिनिसुलु मिनिसुलु मिनिनानै
दै जानानै बार जानानै
नायहरो नायहरो नोङो गसाइ
सान जानानै अख्रां जानानै
बिफां-लाइफां बहाबा थानानै
-
दिनै दैज्लांआव नै गिरि
दिनै दुब्लियाव नै अनसुला
नै मानिजाथाव बोखारहर आंनि
होस्रांहर बहाबा मेँग्लिनायखौ।
-
5/7/2015
आयनि देरा।गामियाव