थिरिँ बिरिँ 1-44 Poem by Ronjoy Brahma

1
गोरबोनि लोरबांथि
समनि हाथासि
हार्सिङै आं गिदिँ गिदिँ
मिथिया आंनो मा नागिरदोँ।
2
माबा सानो गोसो खाङो
रोमै रोमै बिरबोयो
दाखासे गोरबोआव सौग्रावो
गोसोआ सोमखे हाथासि
आय' जायो अम्बासि।
3
गोदौग्लाबदोँ सानस्रिया
माबा लैथोजोँ गोरबोआ
सिरि सिरि बोहैदोँ।
4
गोदोबाय गोदोबाय आंनि
रुगुं मोनस'यै गोरबोनि
दंमानि माबा सानस्रिया।
आय' आंनि गोजावलाय
बुसोमजादोँसै
बिलोआव हां मोनस'यै।
5
रुगुं गैयै गुवार अखोरांआव
बिरबायदोँ गोसोआ
होसो होसो नागिरदोँ जोमैखौ।
जोँमानि सायखं गैयै अखोरांआव
थाखोमा जोब्बाय जोमैया
नागिर नागिर मेँबाय गोरबोआ।
6
गोजोननाय गैया दिनै
बिरबाय बिरबाय नागिरो
मोनाखै आं दाबो
माबा गोजोन्नायखौ,
नागिरदोँ सिरि सिरि आंनो
दान्दिसे मोनगोनखौ आसा।
बिरथिँ फैदोँ दाउसिना
बिरद' बिरद' रंजादोँ
आय' गैया आंहा थेवबो
दान्दिसे
गोजोन्नाय गैया जादोँ।
7
गोसोआ बाना मानोबा आंनिया
गोदौग्लाबना गाग्लोबदोँ सोलेरखौ
उसु खुथु जादोँ मानोबा
बिरबाय बिरबाय
गोजावदोँ अख्रांआव।
8
साननायनि रुगुं गैया
जागायनाय
माब्लाबा जाखो बेबो गैया
सिमाया गैया जोबहैगोन
बेनिबो
बिरबाय
बिरना हान्थियो जेब्लाबो।
9
फैसालि आन्दोआव
मोनहां मोनहां
नुहां नुआहां गोरबोजोँ
सिमब्रे सिमब्रे जावरियो
अरन सिँखावना नागिरो
फैसालि रुगुं गैया-
मोना।
10
लुफावनाय अखाया गोरबोआव
आंनि
बिलिर बिलिर गोदान
सानस्रि
मिथिया रंजादोँ बाज्ल'यै
गोरबोआ।
11
अखाया बोहैयो जिरि जिरि
सानस्रिया गोजावो आंनि
बिरबायना जोमै जोमै
दोमैलु बोथोरा सोमो आंखौ।
12
गोजावदोँ सान्नाया आंनि
गोरोबदोँ गुसु अखानि थरथिँजोँ
बोहैनाय जिरि रिमिन्नायजोँ
सानस्रिया मिनिग्लाबदोँ।
13
लोरबांथिया साग्लोबो सोलेर
नांथा मेँहाबना गोसोआव
दाख्राय हायाखै गोरबोआ
गोमादोँ बहाबा गोहोआ।
14
सानस' हाया गोसोजोँ
हमदांस' हायाखै गोरबोजोँ
लामा मोनाखै थांखियाव
सिरि सिरि दं आं ज'नानै।
15
मेथाइ रिँदोँ खोमायाव
दान्दिसे रंजादोँ आं बेवनो
बिरै बिरै थांदोँ लामाजोँ
मानोबा जाबायदोँ गोसोआव
लामा नागिरनाय गोजानाव।
16
सानहरो' गोसोआ आंनि
बिरै बिरै थांनो हरैहाय
गांखंसो गैया जाबाय खंगा
थांबावो गोसोआ थेवबो बिरना।
17
उन्दैनि समखौ गोसो खाङो
मानोबा जायो हां थोनो
रिउ रिउ थाबोबाय गोजानाव
हालिया लिरनो गुसुं गुसुं
सल'सो जाबाय आर'बनि।
18
फैनाया फैयो लामाजोँ आरो
थांनाया थाङो जेरैबो
मिथिनोसो मोना जाबाय
मानोबा दाबो गोसोआ गुसेब।
19
फ्रि फ्रि अखा हादोँ
जिरि जिरि बोहैदोँ ग्लासजोँ
गोसोआ आंनि रंजानाय उसिदोँ।
20
साननायनि मोजां लामा गैया
दाबो आंनि
थेवबोनो नागिरो बोला बोला
बेवहायबो सुज्राय सुवा खायलाबो
मेँनायसो जाबाय दिनै आंनि।
21
लैथोनि गोथौ दैयाव मुकथा
नुहरबाय आं स्रां स्रां गेबेँ
हाबिलाया बेयाव बोदोर आंनि
थब्ल'नोसो गिबाय मानोबा।
22
रंजादोँ गोसोआ आंनि
रिँखांनाय सोदोबा फोजायो
बाज्ल' बाज्ल' गोसोआ मोसायो,
रंजानाया बिरबायो आंनिया
गुसु बारजोँ समायो गोरोबना
गोसोआ गलियो बेयावनो।
23
आय' गोसोआ आंनि
जेरैबो जादोँ स्रां स्रां गेबेँ
रंजानाया मानोबा बिरबायो
आर'ज रिँङो खोमायाव
दान्दिसे गंस्रोयो आं जोँमाखौ
मेगना था नायगोमायो।
24
आर'जआ रिँदोँ खोमायाव
बिखायाव मानोबा सौग्रावनाय
गोसोआ मेवखांदोँ थाथेरै
मेगनाव साग्लोबदोँ मुहिनाय।
25
औवा बिलाइया मोसादोँ
खोलो खोलो बारा फोजायो
गोसोआ बिरलाङो आंनि
मानोबा बिरबायो मुहियाव
रंजा रंजा बाज्ल'यो गलिना।
26
बिरदोँ गोसोआ सिमब्रे सिमब्रे
जोमैनि सेराव दान्दिसे
मानोबा नांदोँ गोरबोआव।
27
रंजानाय जादोँ दान्दिसे
खोमायाव रिँदोँ आखाय खबनाय
बाज्ल'यो दान्दिसे मिनि मिनि।
28
लैथोजोँ बुंफबनाय बुहुम
नागिरो गोसोआ सानस्रिनो
आवगाय आवगाय हान्थियो
जै खालामगोन सानसेदि जै।
29
मुहियो समायनाय मेगनाव
जोँब्लावनाय साना मोदानो
गोरबोआव आवरायो खन्थाइ।
30
मिनियो देरहानाय गोरबोआ
हमथा हमथा थाबायो लामायाव,
सानस्रिया बिरबायो रुगुंआव
जाखांदोँ गोदौनाय मुहियाव।
31
दाउसा मोख्रेबनि मिनिनाय
गोमोरो हाथासि मिजिँआव,
नागिरो गोदान मिजिँ गोरबोआव
हास्थायो हास्थायो गोगो दाहाराव।
32
आंनि जिउनि खारथियादि
जादोँ फारर्सेथिँ मोखां,
बे लामाखौ नुदोँ मेगन गेबेँ
बोलां बोलां हान्थियो सोरां।
33
मोदानो जोँनि बाल्बआ मेगनाव
नायगङो गंस्रिना हान्थियाव,
आनज्लिद आन्दायै थाबायो
मिनिनाय जायो गोरबोआव।
34
हास्थायो लुबैना गोरबोआ
मुहियो बोयो गोरबोखौ,
सानस्रिनि दाहारा फोजावो
गोजावना बोहैयो लामाजोँ।
35
मेगना आलौवो दान्दिसे
गोमो नायहाबो मोखांआव,
जायो हास्थायनाय लोगोआव
नागिरो खना खनायाव।
36
दुंबुर थुलुंगाजोँ साग्लोबनाय
गोरबोआव जाखांदोँ सिरियै
बिरो हारसिङै थांखियाव।
37
सानस्रिया गोरबोखौ
अरफ्ले अरफ्ले जाख्रेबनो लादोँ,
थारै बेखौदि दबथायनो
राहाया आंनि मोनसेल' जादोँ
बुरखायो बिलिर बिलिर बिलाइयाव।
38
जेँनानि हेब्रे हेब्रे लामाया
नुहरो रोखा थेवबो सोरां,
सिमब्रे सिमब्रे नागिरो लामाखौ
स'हैगोनबायदि गोथार
हान्थियो जेब्लाबो लामाजोँ।
39
ओरैबायदि गोरबोआव
गैया हाबिलास
नंखाय लुबैना सुफुंनो दसे
जायखौ हाबिलास जिउआव
फैखागोन सानसे समायना
रंजानाया फैखागोन अरायनि।
40
गोरबोआ आखाय खबदोँ सोदोब
बिखायाव मानिबा गोमोनाय,
समायना नुहरो लामाखौ
थाखो दफा सुज्रायनि स'फा।
41
रंजानाया फैबावो दान्दिसे
हमथानो गोसोआ लुबैयो,
मोसायो मिजिँआ बरायनायाव
गोजावो गोगो सानस्रि रुगुंआव।
42
बाज्ल'खांना बोहैयो सोलेराव
गोदौग्लाब मोसायो थै निजोरा,
लुबैनाया रिङो गोरबोआव
मेगनाव सारफावो समायनाय।
43
एवथुयो आंनि सानस्रि
हरखाब सानाय सोलेराव,
हान्थियो लोरबां गोरबोआ
मिनिस्लु बिरबायो मिजिँआव।
44
मोदानदोँ गोरबोआव मिजिँ
मिनिस्लुनाय लाजियो,
बेयो गोरबोनिनो अब्लाबो
हास्थायो जोँनाय सोरांखौ।