आंहा दुखु दं अनजालि गोमानायनि
नाथाय बेनिफ्रायबो दुखुसिन
आंनि गोसो गोरबो अनजालिया लांफानायाव।
आंनि मेगन मोदैया रानलांबाय
थेवबो आं खोनायो दाबो-
हरफ्रोमबो, जाय समाव आं
अनजालिखौ बावगारना सिरि उन्दुयो
बिनि थरथिँ थरथिँ मोदै गसरनाय देँखो।
आं आंनि गोरबोखौ लाइफिन्नो हाया
मानोना अनजालिया गोबाना लादोँ,
थि थि गोरा हमथुमथारना
गावनि गोरबोजोँ खाबथानानै।
आंखौ जंखायनाय बादियानोसै
एबा लाजिफोनांनाय नङाथ'?
फुंनि समाव गेवलां गेवलां बिबार बारनाया?
आं एखमबा सिखाव जायो
नाथाय अनजालिया दिखार गोनां गारां हगारो,
आं फैफिन थाङो लासै लासै.....
अनजालिया खोनामोनै।
जेब्ला आं बे मोनसे गोरबोखौ लाबोनो
सिरि सिरि थांना फिन
फेलेँआव फैफिन नाङो
नाथाय आंनि आगाना थाबोथारो,
अब्ला अनजालियाबो हब्रा हरो-
'नोँहा बोलो गैया,
नोँहा सोलो गैया,
नोँ लांफिननो आरो हाया,
आं थैगोन, अब्लाबो-
नोँनि गोजोँ गोरबोखौ
नोँनि मुस्रिखौ आं लांफागोन,
जा आंनि थैयाव दं
जाय आंनि जिउआवनो दं।
नाथाय आंहा बुंब्लाखि दाय जागोन-
नोँनि जिउआ आंनिनो जिउ?
थेवबो सना नोँ फैगोन सानसे
नोँ फैगोन सानसे
आंनि हाखराव,
जेराव आं गोजोन्नायखौ मोनो।'
This poem has not been translated into any other language yet.
I would like to translate this poem