बहानि बार बारबोदोँ Poem by Ronjoy Brahma

हालिया आं सहायनो हालिया
इनाय अनागार हिंसा हिँसि,
बाथौ बमाया बहा थांखो?
ब्रह्म हाथियारा बहा गोमाखो?
हालिया आं सहायनो हालिया।
समायना रमायना बिबारफोरा
सेर्जा सिफुंनि रिँनाय देँखोआ
बहा सिरिलांखो बहा गोमाखो?
सनानि जोँनि रायजोआ
लंका सावनायावसो खामफाबाय नामा?
बहा थांखो रुजु-रुमु संसार जानायनि मिजिँआ?
गुवार हाबिलानि सिमांआ?
मानो मानो मानो......
जोँनि सिलायाव नै नायहर नोँसोर-
खाना नामा नोँसोर?
लेवार बेलाव मानबायनायखौ......!
(बारि खनायावल' नङा)
नुवाखै नोँसोर थाम्फै उराव बिरथिँनायखौ।
हालिया आं सहायनो हालिया
गोजोन निजोरा बोहैनो
मावथि जोहोलाव खांख्राइस्रोनखौ
सोर फोजोबखो, सोर?
समायना-समायना मिथिँगा रंजालि
दाउस्रि थेबथेफारिखौ सोर फोजोबखो,
बहा बबाव जाम्बा आदुवाबि फलान
सोर अलसियास्रोन जोहोलावनि गोदान जोनोम?
हालिया हालिया आं सहायनो।
गान्घीनि अहिंसाखौ मन'नाय
नेलसन, टेरेसानि सानस्रिखौ मन'नाय
सोर गोदान राबणनि जोनोम?
हालिया हालिया आं सहायनो।
बहा थांखो बालमिकिनि समाया-
ना थैफामारदोँ नामा हिर'सिमा-
नागासाखिनि बमा गोग्लैनायावसो?
जतिस्तुर जोहोलावनि थैया गोदौदोँ
आंनि गोदान हाथियार नागिरनांदोँ।