आयनो लाइजाम: लजिँनिफ्राइ Poem by Ronjoy Brahma

आयै आंनि- नोँ माबोरै दं?
आफाया मोजाङैनो दङ ने?
गोबां गोबां दैज्लांनि खामानि
गोग्लैसोना थानाया फोजोब जाबाय?
आं मोजाङैनो दङ आयै।
मैयानिफ्राय जोँनि कलेजा जागायबाय
आं साननैसो बन्द मोनबा
न'आव थांगोन आयै।
आफाजोँ खामानि मावफानो।
आं नोँसोरखौनो जोबोद सानबाय थादोँ आयै।
दैज्लां दुब्लिनि खामानि जोस्लाबै
न'खौ गारना, खामानि गारनानै
लजिँ थाफैनांबाय आं
नाथाय बेबो नोँसोरनि थाखाय आयै।
नोँसोर आंखौ गोसो खाङै खाङै
गाबाखै ने आयै?
आं मोजाङैनो दं,
आं मोजाङैनो थागोन आयै।
फैगौ समबाराव आं न'आव थांगोन आयै
नोँखौ नायनो आरो आफाखौ,
नोँसोर मोजाङै दङना आयै?
आङो नोँसोरखौ खाथियाव लानानैनो
खुसि खुसि आगान होगोन-
आं जेब्ला मिनि मिनि सिला मोनहैयो
नोङो खुसियैनो आंजोँ मिनिदेरगोन,
नोङो आंनो ओँखाम गोजां खुरना होगोन
आं मिनि खुसियैनो जागोन आयै,
मेँनाय: मेंग्लिनाय देहा गोसो थाब्लाबो,
आखाय आथिँ सुनानै,
दान्दिसे जिरायनायनि उनाव।
बेलासि बेलासि नोङो गलायाव थांगोन
दुगैयै लोबै देलायनानै आं न'आवनो थाबाय थागोन,
आं न'आवनि मोसौ हालुवा आरो
मानै मोसौ गायखौ लायगोन।
नोङो आंनो मेथाइ लाबोगोन
(मानोना आं दाबो उन्दै,
आय आफानि अननाय नोजोराव)
आं गोजोनैनो जागोन आयै
बेजोंनो आङो गोजोनगोनबो।
मोनाबिलि ओँखाम जाखांनानै
जोँ ज'यैनो रायज्लायगोन,
नोँसोर मिथिया आयै-
जोँनि कलेजा बेसे समायना,
फोरोँगिरिफोरा जोँखौ माबादि अनो।
आं नोँसोरनो खिन्थागोन आयै
गुसु खोलो खोलो बारनि
सुदेम मोनाबिलि मोनाबिलि।
जोँनि कलेजनि सेराव मा मादि दं
बिबार बारियाव मा मादि बिबारफोर दं
आं जोबोद दुगायैनो खिन्थागोन आयै।
(जोँ) आंखौ बर' फोरोँगिरिफोरा
जोँनि सार मेडाममोना माबादि अनो।
आयै नोँसोर मिथिगौना...?
इंराजि-हिन्दी-अस'मिया रावै
आयदानि फोरोँगिरिया माबादि फोरोङो,
आं इंराजि-हिन्दी-अस'मिया रावखौ
इसे इसे रायनो हाबाय आयै
आरोबाव आं साबसिन रोँबावगोन।
मैया आंनि मेगनाव, आं नुदोँ
गावनि आखलनि थाखायनो
आंनि गुबुन लोगोआ कलेजनिफ्राय होखारजादोँ।
आं जोबोद गिदोँमोन आयै
बिसोरजोँ सम सम आंबो रायज्लायोमोन,
नाथाय परम ब्रह्मआसो रैखा खालामबाय,
आंनाव गोदान गियान फैदोँ।
आयै नोँसोर थारैनो मोजां आयै
आफायाबो जोबोद मोजां
आब'- आगै गासैबो मोजां
आफाया जोबोद बोलोगोराबो आयै
उन्दै समाव आफाया आंखौ जोबोद अनोमोनना आयै?
आंहा गोसोआव दं आयै
जेब्ला दुब्लियाव माय गायहैयो
आंबो गाबै गाबै थांफा थारोमोन
आफाया दै बारब्ला गावनि फाफ्लियाव
आंखौ थिखोना लायोमोन नङाना?
आङो खुसियै बाज्ल'सिनथारोमोन।
आयै नोँसोर मोजाङै थागोन आयै
आं आब'- आगैमोनाबो थागोन मोजांङैनो।
आयै नोँसोर आंखौ फोरोङाखै होनबा
सानानो गासैनिबो जोँमा होन्नानै
सोरां जेराव गसाइ बेयाव
गियान जाइया, ब्रह्म बिनो होन्ना।
आं खुलुमदोँ आयै सानखौ
फुं- बेलासि हाबनाय- ओँखारनाय
आर'जबो गाबदोँ आयै:
जोँ गोजोनैनो थागोन होन्ना
जोँखौ गोजोनैनो लाखि होन्नानै।
नोँसोर जिँगा सिनाङा आयै
आफानोबो खिन्थादो आयै
आं सौहैथारगोन थांखियाव
नोँसोरनि गोजोन देरा लुनो;
फैगोन समबाराव आं थांगोन आयै
गोबां बाथ्रा नोँसोरनो खिन्थागोन
जै गोजोन जाथोँ आयै-
परम ब्रह्मनि अन्नायजोँ जेब्लाबो जै जै जाथोँ।
जिउ गोरबोआव ब्रह्म गियाना फैथोँ
सोलेर मोनसेयाव मोजां हाबा जाथोँ।
ॐ शान्ति! शान्ति! शान्ति! !