नायहरदोँ आं गल'ल' Poem by Ronjoy Brahma

अखाफोरा दलरै दंमोन दावदै सोरांङै,
आद्रा जोँनाय, आद्रा मिनिनाय
दुलाराय जिबिखौ सोमो फोनांना।
बिनि बिफा साना,
बुथुम बायदोँ साननि उनाव सान,
बिनि बिमा मुलुगा,
खांदोँ फिसा मिथिँगाखौ,
हर खोमसि सान्दुं अखा सौसिना।
समायना मोनाबिलिया आनज्रायलांदोँ,
रैसुमै बाराव खानाय फोरान्नानै।
अखाफोरा नायहरनाल' थादोँ,
बियो साननि फिसाजो,
लोहाबनायबादि दैसायाव
गोबानायबादि अनजालि बिखायाव
नायहरदोँ आं गल'ल'।
लाजिसुलि नोँनि हाबायाव
सनाथि. मैनाथि हाथर्खि सिख्लामोना,
हालो हालो जोमैयाबो मुखुब,
बेसेबा समायना नोँनि जुलियाव,
नोङो लाजियो आरो लाजियो
आंखौ नुहरबायदोँ खोमा...!
नाथाय आं नोँनि रजे नङा,
नायहर साना फैदोँ,
गुगुरुब नोँजोँ खुलुम जानो,
मुलुग बिमायाबो गाबदोँ,
नाथाय-
गोमोथिँ, सांग्रेमाफ्रा खुसिथार,
होंगो दोँगो जेरैबो,
हाथर्खि सिख्लामोनजोँ मोसानो,
बोर सास्रिगोन साना,
आं बुंगोन हे गसाइ!
हो हाजासे खुसियै खाफालाव।