दुनालि दैसानि हांसो सिलारि Poem by Ronjoy Brahma

सोर रोजाबामोन मेथाइखौ
अ' फैदोँ गोसोआव-
बिग्रायदा आब' सुलेकामोन,
बेसे रमान्टिक! सोमखोर जेरैबो....
सानै सानै दुनालि फारसे आगान आंनि
थारैनो समायना! !
गोगो दैसानि बिखाव
गोसो होहाबना साम'नि खन्थाइ लिरनाय
दैसानि जल्दं मल्दं खबामजोँ मोसानाय
गोदै हि-हि-हि मिनिलांनाय।
How I wonder what you are!
सोरनि बेयो सिरिया?
अ' जेन टेइलर (Jane Taylor) नि नङा होनबा?
गोमो हाबदोँ आं-
हाबाब सना खैनासान्ति नोँ
मालु दाउरि सिख्लासो-?
नङा हांसो सिलारि नामा
दुनालि दैसानि? ?
लाजिसुलि गोसोआ
गब्लं जिब्लं आंनि सान्नायजोँ
अखा फ्रि फ्रि हानायबादि सोलेराव
समायना नोँनि सान्ति होनायाव।
सिखोला नोँ-
सिख्रि, आसागिसो ना बैसागि?
आं बोदोर जादोँमोन थाखोमा थाखोमा
नोँनि दौबा खेँनाय- फांनायसिम
नोँनि रिमोनद्ला सोलेराव....
नोँनि गुफुं सोलेरखौ।
आंखौ नुहराखिसै नोङो-
बिरलांनो बबे मिथिँगायाव? ?
हांसो सिलारिनि देलाइस्रि साजायनानै।
आङो गोसोखांहाबदोँ रेबगन लानानै
नोँनि सावगारि बोनो
स्राय खन्थाइखौनो लिरनो
नोङो खैनामार ना मोदायजो
आयदानि खर'सा नागिरनानै।
इन्जुराव सैना दोन्नाय
हाथाय गैयै आबैनि सावगारियाबो
नोँनि मिनिसुलुनाय,
थारैनो नोँ-
बिणा लानाय मिरानि सावगारि।
बोरमा गोबानाय दारि जामाव-माव
सोरजि प्रभुनि सावगारियाबो
आंनि महर सना
जाबथुसे बिबार नोँनो होनो;
आङो खोमोरनोनो हायाखै
जोँबाय थानाय साथिखौ।
नोङो सानस्रिबायथा दुनालि दैसायाव
आंनि गोगो बिसम्बियाव,
आंनि गोसो साथिया फैसालियाव-
जोँमा साना एब्रेनायसिम।