खबामदोरोद्नाय गोरबोनि खन्थाइ Poem by Ronjoy Brahma

रबि ठाकुरनि दोँफा दारिखौ
नागिर नागिर जेज'लंगि दाउआ
बेसेबा समायना गोजोनै न' लुदोँ
-
थेवबो गुरुदेब बड'फानि फिल'सपिखौ
बिसोर सुजुनो हायाखै
गंसेल' दिङानि लोरगिया
सौहाया सौहाया लैथोआव
-
दाबो हाफिसा हौवा दाउ
दिखार गोनां दाउ हुदुनि गारां
रिँबाय थायो आंनि खोमायाव
-
सोँहै चित्तरन्जन नियाव
जुजायनि अरजोँ सोरो
दोहो दोहो खामग्लि जायामोन?
-
लाहारि सारआबो खिन्थागौमोन
बबेनिफ्राय बबेसिम-
थाथिर गैयै गोसोनि बान्दा
सोलोँथाइ मोन्नाय गहेलआ खारामोन?
-
दिनैसो आरोबाव गोदान रादाब
फालो फालो बर'फोरा
मुम्बाइ ना बेँलरआव मोनसे आफाद दाबायनो!
आफादनि मुङा अलसिया ससाइटिनो!
देलाखब देलाखब बेयावनो ज' जाहैबाय
-
गोलोमदै फस'राबा घोन फैया
मोदै हुगाराबा उदै बुङा
बेफोर बर' बोरायनि राव
थारै बड'लेण्डआव ओँखाम गैया?
-
बर'फोरा हाग्रा एवस्रांदोँ
बड'लेण्डनिफ्राय बेँगालरसिम
बेजोँनो गोदान हानजाया आगान होदोँ
बाथौ बोरायखौ खुलुमस्रा खुलुमस्रा
-
हारि सिबिनाय ना हादोद अन्नाय
बेयो थांखि बिसोरनि इयुन?
ना हारिखौ सिनायथि होनायनि?
-
सोँहै आमटेकानि टेला आवलानाव
खिन्थाथारगोन थांखु नायै नायै सल'खौनो
गल्दं फलाना बबे बबेयाव
अन्थाइ नागिरामोन बाथुल गावनो?
-
दाबो नुयो लांखार बिमा दैलामाव
मावरिया गंगार हाजोनि आफांआव
ब्रे ब्रे बिनिल' आगान
-
सोँबाव आलाइस्रि आनैनाव
हाजो मावरिया बावखुंग्रि
बबे हाजो हाजो....
-
आमलाइगुरि मैनागुरि सामथाइबारि
पर्बझरा रौता सारियालिजोँ
बहा गामि गामि....
सोर अनजालुखौ नागिरामोन
-
खोनासंनोबो हागोन सिरियै
आमटेका हाथाइआव उन्दै गथ'फोरनि-
जिनै बोसोरनि हिनजावसाया दोनखारलांदोँनो!
बहाबा बेँगालर ना मुम्बाइयाव
-
बाजिबा बोसोरनि बोराया बिहारी लादोँनो
जिनै बोसोरनि सिख्लासा
गोजोनानो गैथारा गोरिब नखरा!
-
नीलुआ थाबावनाय मोनब्ला
मेथाइखौनो स्राय रोजाबगौमोन
फैफिन फैफिन सनाफोर होन्नानै
-
नाथाय फद्मस्रि ब्रह्मआ गैलिया
बिखायाव जोर नांनाय
'दानि बर' फिसा' होन्ना
जोनो जोनो मेलेमजोँ नैथि खन्थाइ लिरबावनो
-
खेबसे सोँहैखांबाय आं माब्लाबा
आदै उर्खावनि खाथियाव
बियो बुंबायबो-
...........
उदांखौ आं नुबाय
बेनि ब्लां ब्लां अख्रांआव
.......
-
गय खान्थाल थाइजौ
साल तिथा आमलाइ
बारि गंफ्रोमबो जोँनि गामिमोन
दाबो दिनैबो जोँनि गामि?
बंङाइगामि दैसापुर माइरां थैजापुर
आरो-
खाम माइखा बिरगोस्रि बुरलुंबुथुर मुंआ थाबावगोनफा?
दखना गामसा खाम जथा
सिखा रुवा गासैबो गोमानो नागिरदोँ!
-
पर्बझरानि साल मुराखौ
सोरबा जावखु जोब्बायनो!
इनाय बानाय बिसोरखौ हमदोँ
सानथाम नोरोकआव अख्रायै सोदों
थसेल' गं गोनां मानासनि गान्दाखौ
आंलाइनो नायगार नायगार गावथारदोँ!
-
बाथौ बमा थानायमोनब्ला
फोजोबसिगौ आं सुथुरखौ
अमा बमाया गोख्रोँङै थानायमोनब्लाबो
आंनि मुलुगा बेल्थायसिगौमोन
-
बैनाव बैनाव सिरि सिरि
सोँबाय आं ब्रजेन ब्रह्मनाव
मानो थैमारखौ 'गेन्दाव मोसाहारि'या?
सम थोस्लाबै बुंगारबाय बियो
......... सुइसाइड।
-
बोरै थाङो बोरै थाङा
बबेनिफ्राय फैयो मानो फैयो
जेबो मिथिथारलिया आं
नार्खो राजाखौबो गोसो खांलिया
गोसो गोथारै अप्रि गुदियावनोसै
जै नोरोक रायजोनि।