गंगार भुटियाफोरनि रुटि-तरकारी
हब हब मोनामफैलायनाय सावमेन मम',
नायनो समायना मावरिया हाजोअ
दा मडेल हादान बर'फोरनि।
बिरगोस्रि गाम्बारिमोना
गोदो बेयावनो गंगारखौ होखोदोँमोन,
जल्दब मेब्ला सिखारिमोनहा
गोदो बेयाव मैहुर खालामदोँमोन,
दं दं दाबदंआ खान्थाल गोमोन
बानै बानै बेयावनो फामु खुंदोँमोन,
दा मैदेर आगानबो नुलिया
सेसा मैनि खिया आफोरगिसो जाबाय,
बेयाव दा आमलाइ, खान्थाल
थिनथ्लां, सालगुरि बायदि गामि।
बां बां सुबुं सानखोआ बांबाय
जानाय-लोँनायनि दावराव-दावसि
इनाय अनागारनिबो बांग्रिँ मावबाय।
सोँहैनांसिगोन नाब्ला सारनियाव-
मानो जोनोम होखो एनडिएफबि खौ?
थफेन आफायाबो खिन्थागौमोन-
मानो होख्रावनांखो रायजो बिनानै?
दानि बर' नष्टालजिक खन्थाइगिरिफ्रा बुंनो हागौ
मा बेलाइ 50/50 आ?
बर' हादोद बर'लेण्डआ मानि थाखाय?
नाथाय दाना गगै बाबुआ मानिथारानो!
रान्थाब फोनथाब थानो नांबाय।
जोँ दाबो खारलुं थाथिरै गोसोनि-
दाबो दं सिउरि, खालामाटि हाजो
लावख्रि, सिगुन, सिदानि
गोम गोम अरन;
नांगौ दाबो जोँनो हादान आरो हादान।
जाहोना मा जानो हागौ?
सोँहैबाय आं माब्लाबा खेबसे
लाहारि सारनियाव-
मानोथो बुथार जाखो दुर्मावआ?
गोनो-गोथो बुंबाय बियो
'दाइनि? '
बर' सल' अजाफोरनि बादिब्ला
बर'फोरा सिमां दं, थांखि दं
संसार जानायनि, हादान मुं आर्जिनायनि;
मानोथो जोनोम- मिँमां, सिलाफोथार
आमटेका, रेँमा बादिनि...?
बर'फोरनि बादिब्ला
अबं, अबंलावरिया हादानावसो
गोजोन संसाराबो हादानाव-? ?
खिन्थागौमोन कमल बाबुआ
मिमांनि सिमां ट्रेजिडिखौ
गोर्बो गावथाव जारिखौ।
बर'फोरनि असुर आखुआ दाबो दं
सोलायाखै, सोलायाखै थार्लायै।
गोमोनो हागौ गोदान जोलैया
'आदा प्र'जिया फैफिनबाय- फैफिनबाय?
बबेव थाङामोन? बबेनिफ्राय
फैफिननांगौ जाखो? '
This poem has not been translated into any other language yet.
I would like to translate this poem