हारिया खैफोदआव गोग्लैब्ला
बयबो दुखु मोनो गाबखाङो।
नंगौ बिग्रायारि उदांस्रि बर'फोरा
कमिउनिजमखौ हास्थायो
समाजबादखौ गासै माहारिया हास्थायो।
'अरखि' बर' माहारिनि
रोहो रोहो जोँनाय खोमसिनि
सिबिजाथाव आफा नोँनि गोथौ सानस्रि
जोनो जोनो गोरबो बिबुंथिया
सानसुमै गोसोनि गासै नोँनि फोरोँनाया।
बिग्रायारि गोरबोजोँ हांख्रायनाय
रिँखाङो गेदेमा नोँनि देँखोआ
'आं बिग्रायारि' बे मुगानि
'आं बर'' जांख्रिखांनाय मुगानि।
नोँनि दैदेन्नाय हारिखौ
नोँनि बोसोनथिनाय बिबुंथिजोँ
फालो फालो हानजा हानजा
ग्रिद ग्रिद ज' ज'
सोमावसारनायाव बारसोमदोँ मेगनाव मोदै लानानै
दुलाराय दुलाराय बर' माहारिया।
बेनोमोन नोँनि सानस्रिया
दुलाराय रायजोनि बिग्रायखांनायखौ
सरकारा आरो बेसे गोबाव दबथायनो?
नोँनि मोन्थोरा-
'थां आरो थांनानै थानो हो'
बेनिखायनो गोथार गोसोमोन नोँनि
आलादा हादोद- हारिनि
बर'लेण्ड सोरजिनो।
बर' हारिखौ-
'दि ग्रेट नेस'नेलिष्ट' दानो
गेरेमसा बर' माहारि दानो
मुलुगाव जेरैबो हारिखौ सिनायथि होनो।
दुखु नांथाव आफा दिनै
नोँनि बर' फिसाया सोलायबाय
नोँनि बोसोन सानस्रिखौ बावगारबाय
राजखान्थिनि आन्दायनाय लानानै हारिया
फेर्लेब फेर्लेब गुगाबाय गोसोआ
इनाय बानाय खावनै खावथाम जाबाय।
उदांस्रिनि खौसेथि लाबोनाय बिफानि
ब्ला ब्ला सोमावसारनाय उदांस्रिनि
खौसेथि हारिनि मोन्थाइनि
अगियान अख्रा गोरबोजोँ दिनै गावस्राबाय।
गोमालांगोन बर' माहारिया सानसे
गावजोँगाव खौसे जायाब्ला
राजखान्थिनि आबिर गावजोँगाव गेलेब्ला
गावजोँगाव घोरोम मुगैलायब्ला।
This poem has not been translated into any other language yet.
I would like to translate this poem