एखमबा हरबादि मोनो Poem by Ronjoy Brahma

गाबनायनि देँखो खोनायो आं
नैबे हालालि आरोबाव रायजोनि
एखमबा जोबथा थैनि गसरनाय
मिनिनायनि बालाबगासे मेजेरनाय।
माब्लाबा आं नुयो दाउसा मोख्रेबनि मेसेबनाय
गाबोन आरो गाबोन आरो गाबोन
जिउनि साना फैबाय थायो
सुथुरफोरा बारसोमफैयो आंनि मोखांआव।
बिसोरखौ आं सुथारो आरो दान्थारो
बेखायनो दाहाल जाथेजाथे मेंङो आं
मुगाफ्रोम उन्दुनो लुबैयो दिमोल खुन्दानि सेराव।
गोदो मुगासे उन्दुनायावनो नाथाय आं नुयो
दाउथु जरासेनि अख्रां आवग्रिनाय
हाइला-हुइला जिउ फिरफिलानि अख्रां रुजुन्नाय।
बेखायनो आं रोजाबनो लुबैयो
जिउनि मेथाइ उदांस्रि गोमानाय जिउनि
थल्थब सिरिनाय जिउ मिजिँनि
स्रोब गोमोरलांनाय मोकथां सिमांनि।
एखमबा हरबादि मोनो आं
औ एखमबा हरबादि मोनो
मानोना बियो नंगौ सिमाङानो।