आं नुदोँ Poem by Ronjoy Brahma

खांखमा बाफब्बनाय,
गोमोथिँ लोँसन्ना दारि सोमब्रनाय,
गाग्लि एर्ग्लि मैला खालाय जानाय,
बेखौनो मुगैनो रोङा जाबाय
फालो फालो बर'फ्रा;
हरै फारसेजोँ-
उरि जाफब्ब-जोबथारबाय
साल सिरिनि नांगोल-जुंगालफ्रा,
बेखौनो नायनोनो समानो गैला,
बाहादुरि पकेट बुदांनाय एम.एल.ए.फ्रा
खालामबाय हालुवानि सानफ्रामबो हलिड्ए,
आइजोनि सेइल्-हेइल्प माखाया
बोथ्रोदबायबाय फालोसे,
बिसोरबो दाना हनै-
दानो-लुनो, गायनो-फुनो सोलाबलिया,
खर' सुबाव मोननाय सोरनिबा
सोदोब बह्रा खिफिनाया
मोनामग्लुंदोँ बिखायाव,
लाजिखुमाना थानाय थैसाम दाखा दाखा
गोबाना सिबाय असलिया मेलेमखौ,
ओरैबो जालिया
हरैबो थांलिया
रोनावनाय हराव सांग्रेमाया फोरोँबाय,
एन्जर सिखाजोँ अरख्लाब जानो गिनानै
सिमेन्ट बांला लुखोनो,
मोश्रोम मानबायनाय लामायाव
हाद्रि बिरखारहोना नासयनो,
गुदाम गैजायै लान्थिया बिखायाव
गुसु बारा बिलिराखै
बिषखुवा सिगारेड़ उखुन्दैनि बिलिरनाय,
जोँमा गोग्लैयै गुसु लामायाव
जेकेट गानफब्बनाय सुबुं नङा
बिगुर खामि नुजाना
सोरलाब लान्थिया जानाय।