सोलायदोँ Poem by Ronjoy Brahma

मोदै हुगार हुगार
मोसौ गोबोरजोँ-
आबै दाफबलांनाय इन्जुरखौ
आयआ दिनै बोलाबबाय।
गोलोमदै फसर फसर
आबौ सोरजिलांनाय मोसौ फालोखौ
आफाया दिनै फानहरबाय।
आयनि फिसिनाय मानै माथाम
दाउ, फारौ, हांसोखौ
(अमा, बोरमा, सैमा)
आं दिनै मा खालामगोन?
आफानि साल सिरि खुन्थिया
गोसोम खालार् आलाखाटारि बिलिरनाय
बेरा बाथामनि न'खौ
आं आरो बुखुगोन-
RCC बिल्दीँ गायसनगोन?
आबैनि हिसान सालिया
दा आयनि दाउ गग्रा,
आबैनि अमा खाग्रा बारिया,
दा आयनि बोरमा गन्द्रा,
आबैनि थालांनाय गांनैसो दखनाया
दा आयनि माय लामग्रा,
(दारहा गिजि गिजिखौ सावजोबखांबाय) ।
आबौनि मोसौ फालोखौ दा नुलिया
आफाया फानहरबाय,
आबौनि माय बाख्रिया
दा आफानि बियार खाटन,
आबौनि मोसौ गलिया
दा आफानि गाड़ि ष्टेन,
आबौनि माय(फोथार) दुब्लिया
दा आफानि लबार बागान,
(जेबो आबाद फोलिया गायलिया)
आबौनि गामसा गिजि नुलिया
आयाबो दानो रोँलिया,
गामसा गैलिया जाहोनाव
आफाया गानबाय बांगाल लङि।
आयनि मासे मानै फिसिनाय
दाउ, फारौ, हांसोआ
लासै लासै नाथाय नंलिया,
हांगार नांफबनाय दो-दोख्ला
(साराय, थौ, दैहु)
बाङा सिङा जाजोबबाय
फैलायगोन माबा फुखार थुखार
(रुनाय हांनाय एलेकट्रिक) ।
आफानि गाड़ि बोरायखौ
मिथिखागौ- आं सालाया,
दिवा दिवा लबर बागाना
सोलिखानाय नङा,
मिथिगौ- थांजोब थारगोन बन्डकआव
(आं गेलेयो जुवा,
लोङो जायो सानफ्रामबो फार्टि) ।
सोलायदोँ गासैबो सोलायदोँ
गोसो महर
गोरबो मेगन
बिखा आखल
सान्नाय, मावनाय, सोलिनाय
गासैबो सोलायदोँ महर।
बिमाया दानो रोँलिया दखना
फिसाफ्रा रोँबावनो बोरै?
गाननोसै गोदान
(सुरिदार, लंपेन, मेख्ला) ।
बिफायानो गानलाब्ला गामसा
(बिमाफ्राबो दानो रोँलिया)
फिसाफ्रा गानबावनो सोर?
गाननोसै मडेल
(हाप्पेन, लंपेन बायदि) ।