सोदोमस्रिया गुस्लायदोँ Poem by Ronjoy Brahma

लाबारिनि खानाया गुगासिनो गुदोँ
अल क्लियार सिम्पु हुनानै,
सोदोमस्रि गुस्लायनाय फुंबिलियाव
देमबाइस्रिनि खानाया जगासिनो जदोँ।
कम्फुटार-इन्टार्नेटनि मुगाया
खर' मेलेमनि एम्फौ फिसिग्रा,
(उसु-खुथु सानस्रिया बयखौबो गाग्लोबदोँ)
डिजेल-पेट्रलनि मोनसे मुगा दा
हाइ लिभिँ हाइ टिँकिँ फिल'सफिनि
जेसेनो दै बाना माथावरि खुरखादोँ
बार-हुंखा सार-अन्थाइ गावदोँ
नाथाय आंनि खानाया लावसिनदोँ
लावदोँ आरो लावदोँ लाबारि देमबाइस्रिनि
बिरगोस्रि गाम्बारि आइजोफोरनि खानाय
दाजाबदोँ आरो दाजाबदोँ आंनि खर'आव।
बुदां गावबुराया हादानफाराव
हालमाजि नागिरना मोनाखै,
(दाहोना रुवाथि नागिरमोननांगौआ सिमांनिसो मिजिँ)
लरग' खन्ट्राकदारा लेबार मोनाखै
गासैबो साख्रि गोनांगोजासै
(मुम्बाइ-बेँगालर-मेगालया
गवा बायदियाव बर'फोरा माहाजोन?)
अ', नंगौ सोदोमस्रिया गुस्लायदोँ
बाबेव आबैनि थांखु आलुवा सोबनाय
सोर नुबावो सोर नुयो?
नारखो बुदांनि
नांगोल मुथि हमनाय नुब्ला
खे खे खो खो मिनिगोन
पेट्रल-डिजेलनि बेसेन जायनो होनो हायो,
दोनसिरि सनासिरि दैसायाव
जेखाय फल'जोँ जुग्रुबनाय नुब्ला
हि हि मिनिगोन बन्दरनि आमोखिफ्रा।