आनजादनि आर'ज Poem by Ronjoy Brahma

दिनै आंनि सेथि खोन्दोनि आनजाद,
हे, अबं गशाइ!
आं नोँखौ साबायखर होयो
नोँदि बोखांबाय आंखौ एमनिफ्राइ...
आरो होखारना खोमसि
लाबोबाय जोँमानि सोरां,
आं आर'ज खालामो
आरो होयो साबायखर,
साबायखर आफा
सास्रिनाय बोर गासैबोनि
नोँ लाबोबाय गोरबोआव मोजां,
ब्रह्म, सोरजिगिरि...
गासैबोनि गुदि ब्रह्म नोँ,
आं राहा बियो अबं
आंनि गोनो-गोथो,
सोदोबनि आन्दायनाय
रंजानाय आरो
मोसाग्लांनाय दिनै गोरबोनि सानाव,
जोँमा, ब्रह्म
सोरजिगिरि आफा आंनि
बोर सास्रि, दिनैनि सानाव
आरो
होखार नंखायै फैगोन...
गिथावनाखौ,
आंनि मोन्दांनाय,
गासैबो आंनि गोरबोनि
ओँखारो आफा अबं
आर'ज दिनै आनजादनि,
हो अबं, हो आफा
गोरबोआव थि सान्नायखौ ।