मावरिया हाजोनिफ्राय बोहैबोनाय
गोगो गोजोँ निजोरा,
स्राइ स्राइ जिरि जिरि बोहैदोँ
आंनि न'सुंनि सेरजोँ ।
बाज्ल' बाज्ल' मोसादोँ मिनिस्लुयै
लोगोआव सेर सेर बाला सेरेप,
उन्दै उन्दै अन्थाइफोरा दुद्रु बोदोँ
जोँख्लाब-जोँख्लिब सेरेबफोरा मुहियो ।
गोगो दै निजोरानि स्रां गेबेँ
मोसाग्लांनाय उन्दै अन्थाइफोरा गोजोँ
गोरबोखौ मुहिहाब होथारदोँ
फारनै मेगना मेसेबनो नागारा ।
दान्दिसे उनाव मोसाग्लां मोसाग्लां
गाम्बारि बिलाइया गोजाव बोदोँ
लामा मोनै उन्दै मोस्रोमा सिरि सिरि
आगोर नागिरना मोनाखै बारग'नो ।
गोरबोआव सान्नायनि रुगुं गैया-
हास्थायो आं गोजावनो दिनै
मावरिया हाजोनिफ्राय बोहैनाय
गोगो गोजोँ निजोरा
आंनि देरासिम हार्सिँङै रंजा रंजा ।
आंनि देहायादि लोरबां
आंनि गोरबोआदि दंङ ग'गायाव
माबोरै हानो आं...?
आंनि सान्नाय, आंनि गासैबोदि गोब्रा ।
This poem has not been translated into any other language yet.
I would like to translate this poem