अखाफोर नायहरदों आं Poem by Ronjoy Brahma

मेंरुरु लामायाव मटर गाड़ि खारगासिनो दं,
दा जिरन गैथ'थारा बिसोरहा।
बिसोर बुङो- Miles to go before I sleep.
सहर-बन्दरनि सैमाफ्रा सोंगासिनो दं माखौबा।
सिमांआव सोंफ्लादोंबो जानो हागौ सिखावआ बेबादि समाव उन्दुलाङो।
आगोलाव संफ्ला अरख'नाय खोनादोंमोन।
अखाफोर नायहरदों आं सिथ्लायाव गसंनानै।
''अखाफोर अखाफोर थाइलिर थायसे हर
नङाबोला थाइलिर थायनै हर'' होन्नानै।
हरखाब जोमैया फांथेयो अखाफोरखौ,
आरो आवबा जायो आं आज्लं आज्लं नायहरबायो।
जोमै एराय एराय नागिरबायो थेवबो नुलिया।
आरोबाव गोसो जाबावो आं,
बिजि खान्दानि बिखुंआव गाखोनानै नायनो।
थुसिगोन आरो सुथेगोन,
थुसिगोन आरो सुथेगोन।
मानोना सहायनो हाया आं बे खोमसिखौ,
मैया आन्दाय नांनाय बे आन्दायनो गोनांखौ।