नोँ सैथो समायना Poem by Ronjoy Brahma

आं बुङो नोँबायदि समायना
नाथाय अख्रांङा जेसे गुवार नंगौ ।
बे जोमैया गोसोम महर लायो
सोमखोर अख्रांखौ नुस'वा
बोहैनाय थरथिँ गोग्लैयो
दाखा दाखा जोमैया हगारो
अब्लाबो आं गोजोनो ।
जोमैजोँ जोमै सार- अन्थाइ बुहुमाव
बिखा खायसिब गोरबोआव
हाथारा आंलाय बारग'नो खोमायाव ।
सोमखोर मिथिँगाया मोसायो
दाउसिन मिफोरा आरोबाव
आंनि गोरबोआ उसिफावो
सानबाय बायना थायो गोजोमना ।
लैथोआ गुवार गोथौ नंगौ
बुंजाया अख्रांबायदि समायना
गोगो दैया खोल खोल मेगनाव
मिनिस्लुयो आंनि मेगनाव गोजोँ
अब्लाबो समायना बुङो जोँमाखौ ।
बिबारफोरा गेवलां मोदोमफ्रु
सिखिरि दाउसिनफोरा जंखायो
गोसो आंनि मेवखांथारो
अब्लाबो थायो जोँब्लावनाय जोँमा ।
आं बुङो नोँबायदि समायना
नाथाय अख्रांआ जेसे गुवार नंगौ ।