मिनिग्लाबनाय Poem by Ronjoy Brahma

बेयो बलिउट् सावथुननि ज'नि लिबार
ना ना...
बर' सावथुननि फैला-मेन्डेला?
हरफा थोलोमानि उदै बिगुर सालायनाय
नङा नङा-
बेयो खोमसिनि मोसावरि
गोमोथिँ, संग्राह आरो खुसेँग्रानि मिनिनाय।
मोले मोले लेम लानानै सांग्रेमाया
सोरखौ नागिरदोँ होम्बा?
ना ना....
जारा फाग्लायासो सांग्रेमानि महरै
बिहामजो मंलिखौ?
बे सोर जाखो जारानि बिहामजो मंलि?
गुमा संग्राहनि महरै बोदोर;
हायलाय हुयलाय मोसानाय,
ना ना मादुरि देक्षियासो-
नङा नङा-
उर्खा सिख्लायासो मोसाग्लांदोँ।
गोसोआ आंनि उसाव बादाव
एम नागारहां नागारहां
एनजर सिखावआ ख्रेख्रेब ख्रेब
मायखौ जिरख'दोँ
थांलाय फैलाय आरो सिखाया
उसुं सेर सेर नोजोर होदोँ
बे आरो खांखमाया (?)
बेसोरबो सिरि सिरि सामब्राम अखरख्लाबदोँ
आरो इंगिनियालाय?
बेबोसो फानलु अरख्लाबना आलौ जादोँ
जाहोनाव सावसुब सुसुब
सोदोब होदोँ।
आबौ बुरखंनि सिखारि बिल्लीया
जमै जमै इंगिनि बारसिनदोँ
खाफाला गाज्रि बिल्लीहा
आबै थिँगिनि बुरैनि
अफ्रि दोआवसो गब्रदोँ
गाबख्राव गाबख्राव बिल्लीया नाजादोँ
अफ्रि दोनिफ्राय बारननो
सोदोबा न' गंसे गोमफबदोँ
जाहोनाव
बेमाफ्रा खारखो खारखो
थोर मोदोमजोँ लुदोँ जे
बिल्लीया गोहो गोरा
गाखोना अरख्लाय थारगोन रागायाव
बेमाया लामा गैयै गोजौ
दिन्दां जादोँ।
बेयो सोरनि- एवथुनाय जाखो?
माब्लाबानो आं दुबफुं सिखारबाय
बुथे बुथे मेगनखौ बिसिनानै
लान्थिया सोरलाब बायजोआव
माब्लाबानो मिनिस्लु जोँमा दङ
लासिँ सिँ बुथे मेगना लाजिदोँ
हायाखै नायदेरनो
गंस्रिना थानांदोँ।