गोरबोजोँ दाहा Poem by Ronjoy Brahma

बायखोन्दा डिमाफुरनि सावगारिया
आंनि मेगनआव नांफैदोँ ने?
डिमाफुरनि बै सावगारि दिन्थिया
आंनि गोहो बोलोखौ
एरखांदोँ ने?
हारिनि अलखदखौ मेगनाव नुनानै
आंनि गोसोआ जांख्रिखांदोँ दा?
आय' आयै बर' बिमा आंनि
आलाय सिलाय हारिनि खैदांखौ
गोरबोआव दाहा खालामदोँ दा?
नंखाय नङा दा बेयो आंनि....
हारि अनसायनो मिजिँ लानानै
सोमखोर मिथिँगाखौ मिनि खिथिनाया
आयै आंनि बर' बिमा
नोँहाबो गोथार सोदोमस्रि दं
बिदिन्थानि फाखनाव बिरथिङो
नोँनि दुखुथिया हब्रानाय
बुब्लिनि बाला बारियाव नोँ
दंहैखोसो नामा साहाराव
आंनि लोरबां बोलोखौ नुमारै
साजायबायसो नामा नोँ आयै
हाजो खर'आव दख्ना सुरिजोँ ।
मुलुगाव सोरनिबा सोरांस्लाब मोनै
आंनि उखुम साजोँ
उरां रकेट
बेनो उन्दु गादुरा आंखौ
फोजाबाय
नाथाय आंथ' अलसिया
सियाय सियाय समा
ओरैनो थांदोँ ।
आंथ' दाबोनो आदुआ आयै
बोथिसे मोनजाबानो खम्बु करण
खर'आव दाबो गैया
गोगो मेलेम
दं दाबो अमा जाखोन्दा
जुजाय खर' ।
आंनि हास्थायनाय गोथौ-
नाथाय गोलाव दान्दायाबो
मोनहास'आ
आंनि गोहोखौ सोरबा
सिरि सिरि सेबाय
लोरबां गोहोनि थाखायनो
दा आंनि गिखौथाया
सोरबाखौ देरगानाय
सोरबाया मालाय सिँजोँ
आरो साजोँबो थांबाय
आं दाबो जुजायनि दाबोरसे
गावनि बिगावथिखौनो खोमाबाय ।
सिमाङावसो गोहो गोरा आं
उरां जाहाजखौ अभार
गोख्रैथियाव साखावग्रा
सोरनिबा गादबनायनिफ्राय
उदांखौ हास्थायनानै
बुरलुंबुथुरनि दै गुथालबायदि बाब्राबग्रा
आरो बाराबा आं हमख्रबजाब्लाबो
ना सिँगिनि खायदायै फार गावनाय
सिँ सिँ साहोना थै लाला-लिला खालामना
खुसियै गावखौ उदां खालामनाय ।
उदांस्रिया आंखौ थुलुंगा
गावखौ बावसोमनो हारिनि थाखाय
नाथाय आं जिउखौ मोजां मोनो
गावजोँगाव दाङाबाजियाबो
आंखौ होदोँ-
सिरि सिरि थाखोमानो हादानाव
नाथाय बर' बिमा आंनि आयआ
सिरि सिरि हुगारदोँ मोदै ।
खोनाफैयाखै आं हब्रा हब्रा
खोमा माथु हायै
दाउखा दन्दायानो आयनि थान्दै (?)
आंनि उन्दुनायखौ गोजोन होआखै
आं गिखौलाय जाम्बा
बाथुल नागिर नागिर
गायदे थुरि उखुमाव सौदावना
खाफालावसो लुन्दुन,
आं गाबो बेयावल'
गुबुनआव मानो दोरखार?
दिनै दिन उदैखौ
बिलिरनो हाब्लानोथ' जायो
आरो गोदो गोदो उन्दुनो
आबगारि गंसे
दरथामसो अरहेग्रा,
जायख्लंनि गोथौ ओँथिखौ
आं बुजिया ।