आं गाबदोँ Poem by Ronjoy Brahma

खोमसि दिनै फुर्णिमा हरा
हाथासि दिनै सुबुंफोरा
आलाय सिलाय बिबार
गथ'फोरा
नै जोँनि लांगोनायाव दाउखा दन्दा
खोमा माथु हायै जंखाय फैदोँ ।1।
हनै गोसोम उखुन्दैया...
सोमखोर अखोरांखौ साग्लोबबोबाय
गैया सोमखोर अखोरांआव अखा मोफ्लामनाय
नायहर हनै.....
बायफ्ले लादोँ गोजोन देरा
अखा मोफ्लामनाय महरै
बेरफ्रुसारदोँ बमा
हनै गोसोम उखुन्दैया...
सोमखोर अखोरांआव बासा बोदोँ ।2।
बिखा खायसिब आं गिदोँ
हमथा हायै मोदोमा मावदोँ
बर'पनि गुसु बिखायाव एब्रेदोँ
राहा आंहा गोमालांदोँ
नुदोँ आङो सुबुंफोरखौ
हाथासि जानाय ।3।
हनै नायहर रिकसा आवला
आंगो बर' फिसाया गोग्लैसोदोँ
हनै नायहर साख्रि आवलाया
सिलाइ थुबथाबना लुथि जादोँ
सोलायबायसो नामा
जुगनि संसारा आय'...
गोमोरलांनाय नंला नामा
बे.... खोलिमुगाया
हनै नायहर दावबायारि
आंगो बिसाया बारजोँ
बुबथिँ जादोँ
हनै नायहर....
हादर अनफावरि
बर' बिसाया गुबुन लामा लादोँ
आय'.....
आय' आय' आय' ।4।
गैया दिनै गोजोन संसार
नागार हाया बोनथुमना लादोँ
आय'.....
नागार हाया दिनै जुमाय संसार
मुगाया दिनै सोमावसारनाय
होबथा बेँथायाव
मुंख्लं जानाय
आय' आय'.....
दाउखा दन्दाया
जंखाय बायदोँ ।5।
मोदै रथ' रथ' रथ'....
मोदैनि संसार
सोरबा थिवरियानि गुलिजोँ
इन्जुर गब्लं
आय'....
आदै फालांगिनि दाजाब-दानख'आ
लाथिख' हिसाब
गोजोन गैया संसारा
गोजोन गैला....
ओरै खावसे हरै खावसे
गेजेराव आय-आफा हावरिया
हाथासि मोदै हांमाजोँ
जिर जिरि संसार ।
खोमसि दिनै फुर्णिनिमा हरा
हाथासि दिनै
सुबुंफोरा।।