दा मिथिंगा नोंनि अख्रांसे बिखायाव
हालदिंगानि थिखिनि खुसेंग्राफोरा मानखोयो,
आफानि दुब्लि आलांगायै गोबाथाबनाय दैयाव
गांजेमाया बिलाइ गैयै अंखा बिफांआव गाखोना बिदै दैयो आरो गयो।
मुलुग आरो सोदोमस्रि, सोदोमस्रिनि गोदान महर
मानसिनि जिउनि हारिमु बायदि बिथिं,
दा आं गोदान महरै नुनो मोनबाय।
बिदै बिथोबनिफ्राइ ओंखारनानै
गावनि लानजाइजों जिबौनि दाहार सुखनानै
फारि फारि एमबु बंग्ला गाबलांबाय अखानि थाखाय;
अखाया रावखौबो मुगैया-मुजुआ।
अखानि थाखाय जिंगा सिनांगौ बाथ्रा आरो गैलिया,
दा अख्रां आरो मुलुगनि बाथ्राया
हाजो आरो हायेननाङै अखानि महरै फरायथाव आयदा,
दाउसिनफोरनि गांखंजों बोहैनाय उदांनि देंखोफोरबादि।
दा समायनाखौ बुङाब्लाबो जासै
मैगं-मैला आबाद फोथारनि खिलि।
आरो गोलेरनि खौगानिफ्राइ बारनबोना
आफानि मोखांआव नुजाफैनाय दिनदां अखाफोर।
गलाब बिबार समायना,
गायखेरबादि दाउदै बिबारनि समायना,
हाजोनि थिखिनियाव गाखोना बिथराइ खिलिनाय बिफांनि समायना
बेफोरनि मादाव बिखायाव बोहैनाय थैआनो समायनासिन।
गाराय फाहामग्रा दैसा थैनि
आदार नाला
आदार जिनज्रि
गुस्थि गारमा मेंग्लिनांनाय देहाखौ जोथोन लाग्रा।
बेखायनो गाव फसायनायबादि
दैसायाव गोजोमै गोजोमै
बेखौनो गाव गावनि थै सानो जों।
This poem has not been translated into any other language yet.
I would like to translate this poem