मानबायस्लिंनायनिफ्राइ थाबायस्लिंनाय अनथाव-बाथाव
खुदिया साना आंखौ नायहरदोंमोन
सिमलि बिफांआव गाखानानै,
बिनि थैजागा मोखांआ बोलांदोंमोन जायख्लंफारसे आंनि मोखां
दुब्लियाव मिनिग्लाबनाय दैआ बांसिनै
लुखुर-लाखारै खारसारदोंमोन
अख्रांआव बेनिनो सायखंबादि जोमैफोराबो खारसारदोंमोन
नबथि सोलायनो मोस्रोमफोरा आगोरमोनै जाबाय थादोंमोन दैबानायाव
मोसौ दोनदाल होना फैनानै जिरायनाय समाव
आं सानदोंमोन-
आंनि गोरबोनि नोंजों गोरोबलायनो लुबैनाय
जिउनि हारिमुवा प्रसान्तनि बिखायाव गोजावबाय थादोंमोन
जों गाव गावनि जोनोमनि रोखा सोमोन्दोखौ
आरप लैथोमानि हर गेजेराव सिनायथि होगोन
नै दोरबि दानिया आं बुंनोसै-
आं नोंखौ मोजां मोनबोबाय थानाया
दानिल' नङा बेयो गोजाम दायनासुर मुगानिफ्राइनो
नोंखौ आं दायनासुरनि खुगानिफ्राइ बेसेबांदि रैखा खालामबोखो
आं बुंलिया, आंसो मिथिगौ
दा बे समाव मुगासे थांनायबादि
सिमलि थिखिनिफ्राइ थिखिनिसिनाव मानखोनानै
सेंग्रा देरनाय साना आथोलान्थिकआव बाज्रुम हैबाय
अब्लाबो फैफिनगोन बियो सानस्रियै सानस्रियै
This poem has not been translated into any other language yet.
I would like to translate this poem