गावखौनो गाग्लोबनांगौ जेबो गैया Poem by Ronjoy Brahma

सोदोबनि ओंथिफोरा गोसोम जानायनि थाखाय
सोदोबफोरखौ सियाराव दलर फज'नानै आं बुंबाय-
नोंसोर ओजों-हजों दुस्थ' दाखालाम
नङाबा नोंसोर गासानि सालायाव गोग्लैगोन मिथिखा

गासाखौ थोर थोर गियो मोखां फांथेनाय सोदोबफोरा
अखाफोर गिख' सांग्रेफोरबादि
खोमसिनि खाबु लाग्राफोरा

गावखौनो गाग्लोबनांगौ जेबो गैया
मानोना नों आरो आं राननानै होनो हायो जानाय खाजा
सालाइ गुस्थि बिबु-बिला
लाथिख' सुफुंनो हायो बाहान्दारनि

बेनि थाखायनो बेखायनो आं दा बुंनानै लानो हागौ
अख्रांआव बयनिबो उनथाराव बिरबायनाय दाउ जेहेथु आं
नंगौ आं सिगांआव बिरनाय दाउफोरनि गांफोरखौ नुजोबदों
बिसोर गावजोंगाव फायख्लाय लायनो नाजादों

जेन'बा बिसोर जोलुर बादायारिजोब अख्रांनि

लासै लासै साननि बिखायाव समनि इनजुरफोरखौ सौसिदों आं
बेनिनो गेजेराव जिंगा सिनांगौ जेबो गैया
बेनिनो गेजेराव जेराव
जेराव जेराव समनि गिसि गांखंफोरा फिन साननि बारआव गोख्रों जाफिनबाय

गावखौनो गाग्लोबनांगौ जेबो गैया

जाहार अन्थाइफोरनि.......
नङा नङा गोरबोनि अन्थाइनि बिखायाव
बिफांआ रोदा सुथाबबोला गेरेमसा जानायनि थाखाय
अन्थाइआ गावस्रानानै हायनारि गुनद्रासानि महर लागोन

नुनोमोनै गोरबोनि खना-खनलायाव
आं गावनि गोरबोजों थर्स सुनानै आं नुनो मोननाय
खर' दिखांना सानफा-एफा देरबोनाय अन्थाइफोरखौ
आवलिहोनो नाजानायानो जोंनि मावनां

बेफोर नांनाङै मोदोमाव सोमजिनाय मेजेम

लामायाव अन्थाइ देख्रुबग्राफोरखौ
बेखायनो आं गोसोखांबाय थायो
अन्थाइ देख्रुबग्रा बिसोरनि आसिफोरखौ जोबोद मोजां मोनो आं

बुंनाय जायो लोगो
नों आंनि गोरबोखौ गाग्लोब
आं गाग्लोबगोन नोंनि गोरबोखौ
सना आरो सना, सना दिहुननायनि थाखाय

बे समाव अन्थाइ देख्रुबनायनि सम सुन्दर लामानि थाखाय
लामाया नोंनिल' नङालै आंनिबो