लाथिख': औ आंनि लोगो Poem by Ronjoy Brahma

नंगौहां नंखायहां असदा असदा मोनब्लाबो
आं दानिया बुंनानै लाग्रा जाबाय
''मानसिनि सोलाय एम्फौनि बाथ्रासो आंनियाव सोँ'' होन्नानै।
गिलुबालु गेलिलिवनि फिन्नायखौ थामजौ दजि बोसोरनि उनावसो
नंगौ बुंदोँमोन प'प जन प'लआ।
नाथाय बेबादि होन्नानै आं गेलिलिवनि खाथियावनो थांनो हाया।
आथिँनि आखायनि खोमोन खमफि खमफि
खर'नि खानायाबो गुजोबलांथारगोन बे हले सैथोखा।
मानोना खेरेन्दाय गोथैनि आथिँ सान्नानै
दाबो आनजादखौ उथ्रिग्रासो आं।
थगायथसि सियाराव जिराय जिराय,
आखाय आजाव आजाव उदै बेल्दां जानायनि मिजिँबो थानो हागौ।
इसोर जोनोम जानायनि सिगां
एरिष्टलनि गोरबोखौ सान हर
मेगनाव ससमा सैनानै फरायबाबो फरायखनो हाया।
सिमांआ सिमांबादिनो मोकथांमार आं,
जानो हागौ आं बेबादिनोखा।
अन्थाइजोँ अन्थाइदि अर जोँमारो बेखौ नंखाय होन्ना बुंनो
अन्थाइ गोथैखौ देदोँ आं थे थे थे।
औ आंनि मुंआ ''थेथे'' गोसोआव फैदोँ आंहा।
जेसेनो अन्थाइया गुगालाङो, आंनि मुङाबो गोमालाङो।
मानोना अन्थाइ गोथैया स्लिम स्लिम गोजोँ जाया।
बेखायनो फोथायग्रा जाबाय आं
अन्थाइजोँ मानसिया अख्रां नांगा न' लुयो।
मानसिया दायो गसाइया सिफायो होन्नाय बाथ्राखौ
आरो बबे बिखाजोँ फोथायलायखो?
नंगौ बेसेबा फोथायग्रा जाबाय आं गावखौनो गाव।
गोसो जायोब्ला आं आंनि गोरबोनिफ्राय
इसोरखौ गावथारनो हागौ थिउ थिउ थिउ।
इसोरखौ गावथारनो गरबेसे गुलि नांगोन?
औ 123456789+0=123456789
दाजाबब्लाबो दानखब्लाबो लाथिख'आ फेजेन जालिया।
बेखायनो सथब फैदोँ बियो आंनि सेराव,
आंजोँ लोगो जाफैदोँ बियो।
आंनि आंगो जाफैदोँ बियो,
औ लाथिख' आंनि जिउ।
थैनाय गैया लाथिख'हा,
जोनोम गैया लाथिख'हा।
दाजाबब्लाबो दानखब्लाबो लाथिख'आ लाथिख'आनो।
आंनि गोसोबादिनो बाहायबाय आं बेखौ।
उनाव सिगांआव, सिगां आरो उनाव लाफाग्रा जाबाय आं।