थद Poem by Ronjoy Brahma

आं दानिया अख्रां नांगा नांगा बिरबायनाय
मानसि लांखारखौ नायनानै गोजोन्नाय मोनो।
गोजोन्नाय मोनो सानसुथिर समनि
बिखा फोजा फोजा रोजाबनाय दाउथु गल्दुमाखौ।
आं गोदो गोदो उन्दुना सिरि मोनहां जानाय समाव
दाउज्ला गेसेरनाय फेरेँगा गाबनायखौ गोसोआव गैलिया।
गोसोआव लानांगौ होन्नानैबो सानाखै।
नायहरो आं सोनाब फारसे बिरलांनाय
दाउब'नि फालोखौ ''उन्ना सिगां जा, सिगांना उन जा'' होन्नानै।
औ बेखौनो नायहरबाय थादोँ आं।
ओजोँ जुगु जुगु दाउथु गल्दुमा,
अख्रांआव मानसि लांखारनि बिरबायनाय।
दा आंनि मेगना सोराङो सोनाब फारसे अख्रां फारसे।
आरो आंनि गोसोआ फरायो
दाउथु गल्दुमानि बिखा फोजा फोजा रोजाबनाय मेथाइ।
सिबाय अनजालि आंखौ सामलायनो फैनानै
थर सौथुदोँ बियो लामानि अन्थाइयाव।
''आंखौ बामनानै लांफै,
आं थाबायनो हालिया!
आंखौ बोखांफै आं लिँग्रिसो जाबाय,
आंखौ बामनानै लांफै।''
ओजोँ जुगु जुगु आं फरायदोँ,
ओजोँ गाबख्रावनाय अनजालिनि सुफिनाव बैदासि देँखो।
अनजालिया लिँग्रि जानायजोँ मा खोथा?
थद गैया आंहा, बद गैया आंहा।
गोसोआव लानो हाया हाया फरायदोँ आं जुगु जुगु,
ओजोँ रोजाबदोँ ''उन्ना सिगां जा, सिगांना उन जा'' होन्नानै।