थै सोबग्रानि मुलुग बियो Poem by Ronjoy Brahma

लामायाव थबस्र थबस्र आं दानसनानै गारबोनाय,
दजनसे सुथुरफोरा दिनै लेवार जाबाय।
दिनै बेद्लाव जाबाय बिसोर।
गिरि होन्नाय सोरबा सासेनि
रान्नानै होनाय बान्थानि फिथाइया बेनो।
दाय मावब्ला साजा मोन्नांगौ,
फाफ मावब्ला उद्रायनांगौ होन्नाय बाथ्रायाबो बेनो।
मोन्थोर जारि जारि खासिनि सानानो दोनखादोँ जोनोमनि थाखाय,
बेनि गान्थिखौनो हाया हाया खेवनांगौ जाबाय जोँहा।
फैयै फैयै खारलाय बारलाय,
खारै खारै सफैबाय आं बेसेबा गोजान।
अरन मोनसे गारबोबाय आं,
लैथो मोनसे सानस्रिबोबाय।
अरन अरन आरोबाव हाजो मोनसे बारबोबाय।
दिनै अनजालिया आंखौ गाबज्रिहरो-
''बहा दं आंनि रजे, लामा आन्दायबाय आं बबेजोँ थांखो? ''
आगान नागिर नागिर।
हे अनजालि गोजौजोँ बिरबो नोङो।
बिलाइ बिलाइ फै नोङो,
दालाइ दालाइ फै नोङो।
बेवहायनो दं जिउनि खबाम।
सयथिबो गिखांनाय फैयो आंहा,
अनजालिनि गोथार थैखौ बिसोर जुजु लोङोब्ला?
अनजालिनि गोजा थैजोँ दैसा सोरजियो अरायनि थाखाय!
मोनसे हाजो बारबोनानै होख्राव हरो आं-
गोजौजोँ फै बिलाइ बिलाइ, दालाइ दालाइ फै।
खुदै मननाय मासे सिगुणखौ दागि नोङो,
आसुगुर फोलावनाय सिख्रा बाजोखौ दागि।
थै सोबग्रानि मुलुग बियो,
लेवारनि अरन बेद्लावनि लैथोमा।