स्लगान/गोजोन्नि गोसोआ मोसायोमोन Poem by Ronjoy Brahma

अन्थाइ बिखानि
बिखा बोफ्लंनानै जाग्रा
अरननि दैसाया मिनियै बोहैयोमोन
ना खुस्रा सानस्रियै दावबायोमोन
-
दा सावगारि नुयो बेसेबा गोजाम
सिनायनो हायै दावहारुनि मोखां
हाजार मुगा उदांस्रिनि खुद्रिनाय
अराय उदांनि हाबिलाजोँ
-
रंजानाय जोबनायाव
गुरगुजिया अख्रां
सिरि सान हरनि अखाफोरनि
जिउआ बिसोरनि मेगन मेसेबो
-
जिउनि दिङाखौ खाबथाबाय
दाबोरसे बिलोआव
जावलिया दिङाखौ
जिउखौ फैलाव हगारसारनानै
-
दा मोदैया जायनि सिमा
मोदैखौनो बारनो हाया बियो
उदांनि बारा फैदोँमोन फुंआव
खोमसियाव गोमालांफिनदोँ
-
दा बियो उन्दुफुरि जाबाय
बयबो मेँबाय आरो
बयबो मेसेबनो लुबैयो
दावहारुनि थैया बर'फ जाबाय
-
मोदोमनाय बिरबोदोँमोन आंनि सिमांआव
दा बिसोर सिमांखौ जुब्रा खालामबाय
गोजोन्नि गोसोआ मोसायोमोन
खोमसिया बेसेबा मावग्लुंदोँमोन
-
थेवबो आं सिरि मोनो
सिखां सिखां दिनै बयबो
खोरखि खेवना लामाजोँ नायहरो आं
हागोन बोखारनो खोमसिखौ