दिनै हरानो हर Poem by Ronjoy Brahma

थरसे आदार उखैनायखौ फेजेन्नो हागोनबादि
बिसोर जोँखौ बेजोंनो लफायदोँ
आरो सोर सोर फिदिँदोँ
बोर्सिजोँ हायनानै फिदिँनायबादि
जोँनि गोसो आरो सोलेरखौ
-
जेन'बा जादुगिरिनि माबा थफ्लासो
मासे मोस्रोमा बुद्रुयो जोँखौ
हाजारसे मोस्रोमा गाग्लियो
जेन'बा जोँ एम्फौ लाथासो
-
थैनो रोङै अन्थाइ जायोब्लाबो
मोजोमसे बोलो नांगौमोन
गोसा गोसायै
जोँखौ देख्रुबनो थाखायबो
-
जोँ थरफा थरफा हाथर
नङाब्ला मोनफा दै गेन्दानि फेँफोना
अखा हायो बेयावदि
सान्दुं दुङो बेवहायदि
-
दिनै हरानो हर
अखाफोरा दा दा मिनिदोँब्लाबो
बिजि खान्दायाव खुन्दुं सोनो हायैया
जोँ अखाफोरखौनो लाजिनांगौ जाबाय