आं गोजावलांगोन Poem by Ronjoy Brahma

मेथाइ रोजाबनो गोसो जायो आं
मेथाइ सुजुनानै
आगरबाथि जिउ लानानै
हाथर्खि अखाफोर जिउखौ लानानै
-
दैमा थैयोब्ला दैमानि खासेवाबो थैयो
बिफां थैयोब्ला बिलायाबो थैयो
थेवबो आं थांनानै थानो लुबैयो
आलो गोजोन गोथै हाखराव
-
सिमांखौ बावनो हायाखै
मोकथांनि बिसम्बिखौ जाल्दाब बावदोँ
थांनानै थानो लुबैयो आङो
सिमांखौ मिनि खुसि मोजां मोन्नानै
-
सिउ सिउ बारजोँ रिउ रिउ
जिरि जिरि बोहैनाय दैजोँ स्राय स्राय
आं गोजावलांगोन
जिउनि थुंगेनाय दारासिम
थेगदाव बेगदाव मिनि रंजायै
-
थांना थानाय जिउनि थाखाय बोलि जागोन
रं बिरं मोकथांनि थाखाय सुदेम जागोन
मिथिगौ आं जिउनि थाखाय जिउ
गोरबोनि थाखाय गोरबो जागोन
-
खानाय दोँसेजोँ जारि जारि
जिउ सिमां गोरबोनि मोन्थोरजोँ
बिरहोगोन आं जरासे दाउफ्रि
आरो जोँ दाउफ्रिनि गांखं गोबागोन
-
नेनानै थायै थायैनो आरो
नेनायखौबो सानसे फोजोबनाय जागोन
जेब्ला सिमांनि रंगिना बिबार बारगोन
लोगो लोगो फैसालि गोग्लैयो