खोमसि खोमसि साल दंफां
बबेबा जारमानि हाग्राफोराव
कार्बनडाइ अक्साइडनि गोखा खहाय
मै सेसा रैसुमै दाउसिनफोराबो
मा बुंनो बेवहाय दा रोजाबनो गोजोनलिया
मोसाया दारि फिस्रिना सोगोमदों
बिनि सेर सेर लख्रा आरो सियालमोना
बिसोर गोसोबादि जादों उन्दुदों आरो खिदों
बेयाव दा जोबोद अरन
नाथाय मोगथांखोर होननो हागोनदा?
सिगुन बिरदावनाय अख्रांआव
गोजोन अखा हालिया
(आबै आबौनि रावाव अख्रांआ गोग्लैहां गोग्लैहां)
गुफुर दाउथुआ बहानिफ्राय बिरबोनो?
गमामायै सियालनि हाबाया जायोब्ला
दिनै थोरि दुब्रि गांसोआबो इनायनो रंजागौ
दाउखाफ्रा मेंग्लिबाय जानांगौ
आरो खाल फेसाया बेवहाय बेसेबां गाबनो?
अब्लाबो खुगा रुयायहाब रुयायहाब
फारानि सैमाफोरा सोंदों आरो सोंदों
सिनायनो जायै हरनि दाउसिनफोरा
अखाफोरनि मोखांआव गोसोम फर्दा फानफ्रेदों
बेसे सोरखौ फोजानो सांग्रेमामोना
मोलेले थर्सखौ सेरै सेरै?
अनजालिनि गोमो जारौ महरा
गोजा गोजा जानो हमदों
आरो दाहोना रामोन्दानि
हायना गोनां रमान्टिकआवबो दाय दं
मानोना बियो मिथियादि
सोर्गो नोरोगनि बाथ्रा
बुरलुंबुथुर दैमायाथ' सहायनो हाया हाया
दा बिमा दैयाबो खुरखादों आरो खुरखादों
बिनि सेर सेर लेवार बेलाव।
This poem has not been translated into any other language yet.
I would like to translate this poem