गोदान फैसालि Poem by Ronjoy Brahma

हगार हगार गोसोनि
गुफुर दाउथुखौ
अख्रांआव बिरहो बिनि
उदांस्रिखौ
-
गाग्लि जानाय
रोमोब्रोमनाय हां गहां गहां
बिसोरनि आफाखि सोलागिरि
आं दुब्रि बिलाइ
-
थाबायो थांखिनि लामायाव
रेँजेँ नङै गिलिर नङै
खबाम गोनां
सिदोब सिदोब आगानजोँ
गायसनगोन सुबुं समाजनि दरबार
मोन्थाइ खौसेथि जौगाथाइ आरो
गोजोन गोदान रायजो दागोन
-
रायजोनि बिग्रायनायनि गेजेराव
आं बिग्रायारि
बिसोरनि लंथं सोदोमस्रिखौ सावफ्लेनो
दिँग्रिनि मासिखौ सिफायनो
-
माजोँ मा लानानै
दुगा खालामनो फेलेँ जिउआव-
लाथिख' दिँग्रिनि न'आव
दिन्दां गियानजोँ?
-
बिसोरनि थाखाय जोँनि थांलाय-फैलाय
ओँखाम ओंख्रिनि सोलाव लानाय
गोजोन गोजोन सोर्गोनि लामाया
दा जोबोद अरन
सुज्राय सुजोँ बुंफबनाय
-
बेनिखायनो फै रायजोफोर
मेगननि मोदै नुफेरै बिसोर
हाथाइ गोफार गोफार मोसा लख्राखौ होहरनि
दजनसे सिगुण फालोखौ होहरनि
-
बिग्रायनायनि बुब्लिया हुब्लिरबाय
मावनां हाबानि गोरबोआव
जिउनि मोकथां बिग्रायनाया
थाबथाया बिसोरनि देँखोआव
-
दुंहाव मुगानि अरखि जोँ
आलां-जालां रायजो दाया
गोरिबनि जिनाय हिखौ सुथेगोन
गोजोन गोदान रायजो दागोन
-
थांलाय-फैलाय नोँ आरो आं
बेवहाय खुसिनि फैसालि बोलागोन
बयबो समान समान दावगागोन।