खोलि मुगानि मोन्दांथि Poem by Ronjoy Brahma

रावना रावनिखौ बावगारना
आलारि दामब्रा आसागि-बैसागिमोनखौ बावगारनानै
आं दा रिमिअ' जुलियेटनि सिमां नुयो
-
आदम इभखौ बावगारनानै
राघा-कृष्णनि लिला गेलेनो
दालाय बास्लाय बास्लाय
थेबथेफारि दाउसिनफोरबादि
सानसेनि सानखौ खुसियै हगारहरनो
-
आं दाबो मोकथांखौ नुयो
जयमतीया जेरै जेरेङा फोथाराव
गोसोखौ हमथा हमथा सहायदोँमोन
बेबादिनो सोरबा अनजालिनि रादाय होनाय
-
एसेबां खास्रि बिस्रि मुलुग
आं दायो बिजिरना मोनो
सुबुंनि खुगायाव दाबो परसुनि रुवा
गोबौ जोनो जोनो रुवा
-
आं दाबो गोरबोजोँ मोन्दाङो
सोरबा आयजोनि गोरबोआव
सती सीतानि समाय
साबित्रीनि अनसुलि गोरबो
-
आं दाबो आंनि मेगनजोँ नुयो
दापरनि गोसोम कृष्णआ गपीनि गायखेर खावनायबादि
खोलि मुगायाव सिखावनि मोस्रोम फालो
एबा थगायनाय जाख्रुबनायानोथ' खोलि?
-
आं दाबो आंनि खोमाजोँनो खोनायो
रांख्रेब बिबायारिनि खुगायाव
दुर्ब्बासा मुनिनि साव
-
आं दाबो आंनि मेगनजोँ नुयो
लाइमोन सेंग्राफोरनि
दुर्योघननि अपमान
आंनि खोमाजोँ आं खोनायो
रम्भाबतीनि जिनाहारिनि देँखो
-
आं दाबो खोनायो रामनि देरहानाय
राबणनि मिनिग्लाबनाय
पाण्डबनि देरहासारनाय
-
आं गोमोयो
गोजामा थांदोँ हा सिंखावनानै
गोदाना फैदोँ अख्रां सुफ्लंनानै
अब्लाबो गिदिँबाय थादोँ जेब्लाबो
मुलुग गिदिँ गिदिँ गोजामानो
-
मिथिगौ आं बेखायनोथ'
आबौ हाप्लंनि सुमलि दंफां
आदै नार्जारिनि औवा सायाव
हाथाइ हाराव हाराव दाबो बुहुत
-
थिँथ्लांगुरि हमख्रब अजानि
अर्तब' बेदखौ आवरायनाय दाबो
थां खिनानै फै....।