Koi Bhi Na Deewar Per Se Pukare Poem by Farzana akhtar

Koi bhi na deewar per se pukarey
Magar zehan yaadon ke upley utaarey

Mein palkein bichatee rahon gi hawa per
Mujhey hain mohabbat ke aadab piyarey

Qabeeley ke khanjer bhi latkey huey hain
Kharee hain jahan larrkiyaan dil ko haarey

Palat ker sadaa koi aati nahein jab
Mera dil kisi ko kahan tak pukaarey

Banaya hai tnkon se ik aashiyaana
Kharree hon abhi tak usi ke saharey

Kasak mein hai naina bala-khez sozish
Dehektey hain seeney ke undar shararey